Депутат болып жүрген азаматтың барлығы бірдей мандаттың жауапкершілігін сезініп жүр деп айту қисынға келмес. Бірі жеке кәсібінің мүддесін көздесе, бірі аброй-атақ үшін сайланады. Бірақ, елдің шын қамын ойлап, жоғын жоқтап жүргендердің де еңбегін айтпай кетуге болмас. Солардың қатарында Шымкент қалалық мәслихатының депутаты Еркін Сатқанбаев бар. Халық қалаулысы мегаполистің Көксай елді мекеніне барып, сайлаушыларымен кездесіп қайтты.
15 жылдан бері Шымкент қалалық мәслихатының депутаты болып келе жатқан Еркін Сатқанбаев елге сыйлы ерен еңбек иесі. Еңбек кітапшасының соңғы 16 жылында №2 кәсіптік лицейдің директоры болып, содан зейнетке шықты. Бірақ, ел ағасы қоғамнан қол үзбей, халықтың қамын күйттеп жүр. Еңбекші ауданына қарасты №13 сайлау округінен сайланған халық қалаулысы Көксай 2, Көсай 3 елді мекенінің тұрғындарын жиып, кездесу өткізді. Жергілікті ауданның әкімі, учаскелік полиция мен «Нұр Отан» партиясының өкілдері қатысқан бұл жиында парақтап баяндама оқылмады, жарыссөзге жазылғандар байқалмады. Есесіне тұрғындар мегаполистің даму қарқыны туралы емін-еркін пікір алмасуға мүмкіндік алды.
Бұрын Оңтүстік Қазақстан облыстық мәслихатында депутат, сосын Ордабасы ауданының әкімі болған Еркін Тұрниязұлы биліктің қыр-сырын жақсы біледі. Тәжірибелі азаматтың байыпты әңгімесі жиылған жұртты өзіне елітті білем, барлығы ұйып тыңдады. Ел ағасы Шымкент қаласында атқарылып жатқан тірлікті сараптай келе, өз өмірінен түйген ойларын мысалға келтіріп өтті.
Бұл басқосудың №31 жалпы орта мектепте өткені тегін емес. Бір кездері тозығы жетіп, басшылыққа қатысты арыз-шағымы көп білім ұясы болатын. Қазір алтын ұя бюджеттен бөлінген қаржының арқасында әлде қайда жақсарған. «Жіптің ұзыны, сөздің қысқасы жақсы» — деген нақыл сөзге сүйенген Сатқанбаевтан кейін Еңбекші ауданының әкімі сөз алды. Ғалымжан Ильясов жоспарсыз салынған үйлердің егесіне ескерту жасап, Көксайдың ең үлкен мәселесіне тоқталды.
Тұрғындар арасында «Зеленая балка» деп атап кеткен бұл елді мекеннің көшелері өте тар. Жаман айтпай, жақсы жоқ. Егерде өрт, су тасқыны орын алса төтенше жағдайдың көлігі кіру мүмкін емес. Сондықтан жоспарсыз салынған үйлер болашақта бұзылады деген болжам бар. Еңбекші ауданының әкімі тұрғындар алдында қайта есеп беріп, сөз құдыретін түсінген кісіге ой салды.
Шымкент қаласының тұрғындарын мәдениетке шақырған кездесуде сұрақта аз болмады. Көксай елді мекенінің белсенді тұрғындары мен мұғалімдер ойларын сан-саққа жүгірткен мәселені айтты. Баспана кезегінде тұрғандарды үй мазаласа, ұл-қызы өскен шаңырақты арақ-шарап сататын дүкендердің жүгенсіздігі шаршатқан.
Еңбекші ауданы атына заты сай. Бұл мекенде тұратын халық еңбекқор дейді депутат Еркін Тұрниязұлы. Сондықтан балық бермей, қармақ берудің жолдары айтылған кездесу мағыналы да, мәнді өрбіді. Еңбекші ауданында «Нұр Отан» партиясынан сайланған төрт депутат бар. Соның бірі — Сатқанбаев ұйытқы болған кездесу соңында тұрғындар арыз-шағымын жазып, билік өкілдерінің қолына ұстатты. Көтерілген сұрақтар қалалық мәслихаттың отырысында талқыға түсіп, заң аясындағы мәселе бюджетке ұсынылмақ.
«Айғақ-ақпарат»
