Бәйдібек ауданынан шыққан тұлғалардың ішінде ел басқарған басшылар аз емес. Әкім де, министр де болды. Мүмкін қатпар-қатпар қалың тарихы бар Қаратаудың қасиеті қайраткерлерге қанат бітірген болар. Қала берді Бәйдібек баба мен Домалақ ана жатқан аймақ. Осы мекенді басқарып отырған Бақытбек Танагөзов өткен 2019 жылды қортындылады. Дотациялы ауданның бюджетті 16,5 миллиардқа жетіп, ауыл шаруашылық саласына инвестиция тарту бойынша облыс көлемінде «озат аудан» атанған.
Жазушы Мұхтар Әуезов «Шаянға барсаң әншімін деме» деп баға берген Бәйдібек ауданы өнермен өрісі кеңейген жер. Бірақ, халқының әлеуметтік жағдайы Түркістан облысындағы өзге аудандармен салыстырғанда кенжелеп келді. Өйткені, айтарлықтай кәсіпорын жоқ болғандықтан жұмыс көзі де тапшы. Осыған қарамастан жергілікті тұрғындарының пейілі дархан даладай. Мұны арыз-шағымы аз тұсынан-ақ байқауға болады. Есептік кездесуге жиналғандардың жүзіне қарасаңыз мерекелік кешке келгендей шаттанып жүр. Емен-жарқын, арқа-жарқа отырып аудан әкімінің өткен жылы атқарған шаруасына құлақ түрді.
55 мың халқы бар берекелі Бәйдібектің орталығы шежірелі Шаян табиғи газбен толық қамтамасыз етілді. Енді шалғайда жатқан елді мекендеріне көгілдір отын тартылу үшін жұмыстар жүріп жатыр. Ауданның тағы бір күрделі мәселесі – таза су. 52 елді мекеннің 41-не орталықтандырылған ауыз су құбырлары жүргізілген. Бірақ, кейбір ауылға келіп тұрған таза судың шарапатын тұрғындар дұрыс көреалмай отыр. Құрылысты жүргізген мердігер мекемелердің жауапсыздығынан бәз-баяғы құдықтан су ішіп жүргендер бар. Осындай мәселелерді 2020 жылы шешу басты жоспарда.
Бәйдібек ауданын тарихында талай басшы тізгіндеген. Ал, Бақытбек Танагөзов он үшінші әкім. 2016 жылдың қазан айынан бері ауданды басқарып келе жатқан азамат биылғы жылдың мамыр айында зейнетке шығады. Созақ ауданының тумасы экономист мамандығын игеріп, комсомол партия комитетінде ысылған басшы. Сайрам, Түлкібас аудандарында әкімнің орынбасары болған. Мемлекеттік қызметте абройына нұқсан келмеген Бақытбек Төленұлы туралы Бәйдібек ауданына барып біреу-міреуден сұрай қалсаңыз көркем мінезін айтады. Қарапайым азаматтың есептік кездесуінен сабырлықты байқадық. Қойылып жатқан сұрақтарды байыппен тыңдап, жауабын терең талдап айтты.
Бәйдібек ауданында 887 шақырым жол бар. Өткен жылы ауданнан шығатын күре жолдарға Шолаққорған, Бәйдібек ата, Боралдай бағытындағы трассалар жөндеуден өтті. Ал, биылғы жылы Шаян мен Екпінді бағытындағы жол аяқталып, елді мекендердің ішкі көшелері жаңарады деп күтілуде.
49 білім беру мекемесі бар Бәйдібекте үш аусымда оқитын немесе апаттық жағдайдағы мектептер жоқ. Әлеуметтік нысандардың саны жылдан-жылға жаңарып келеді. Мәселенің азайып жатқанын есептік кездесуден аңғардық. Әкімге қойылар сұрақтар саны өте аз болды. Бұрын екі-үш сағатқа созылатын жиналыс бар-жоғы бір сағаттың көлемінде бітті. Сөзге шешен, сыйлы қария бата беріп, жиын соңында бір-біріне жақсылық, береке, сәттілік тілеп тарқасты.
