Түркістандық делегация сапарының алғашқы күнінде Петропавл қаласынан 150 шақырым қашықтықта жатқан Жамбыл ауданына да ат басын бұрды. Солтүстік Қазақстан облысының бұл өңірінде оңтүстіктен қоныс аударған отбасылар саны 52. Барлығы да «екі қолға бір күрек тауып», бүгінгі күні еңбегінің жемісін көріп отыр.19 мыңнан астам тұрғыны бар ауданға 13 ауылдық округ қарайды екен.
Жамбыл ауданы әкімінің орынбасары Нұрлан Сұлтанғазының айтуынша, «Еңбек» нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған мемлекеттік бағдарламасы одан әрі қарқын алмақ. Яғни, ағымдағы жылы тағы 48 отбасыны орнықтыру жоспарланып отыр. Ол үшін арнайы баспаналар да салынуда. Ал, көшіп келіп, өз кәсібін бастауға ниеттенген азаматтарға егін егетін жер және іске қажетті барлық жағдайлар жасалады дейді. Бұл тұста қоныс аударушылардың жағдайымен танысқан түркістандық делегация олардың алдағы жоспарларына құлақ түрді. Айта кетсек, 2019 жылы қоныс аударғандардың ішінде 14 отбасы, бүгінде жеке кәсібін ашып, жүйелі жұмыстарды жүргізіп үлгерген.
«Айғақ» телеарнасына сұхбат берген қоныс аударушылардың бірі Динара Тасболатова Түркістан облысының Созақ ауданынан 2016 жылы отбасымен көшіп келгендігін айтады. Алдағы уақытта кішігірім базар ашуды жоспарлаған ол, бүгінде ірілі ұсақты төрт түліктің басын түгендеп, еңбектің нанын тауып отыр.
Түркістан облыстық мәслихаттың депутаты, «Нұр Отан» партиясының және қоғамдық кеңестің мүшесі Дулат Әбіш Абай Құнанбаевтың құндылығын насихаттау мақсатында, ұлы ақынның «Сенде бір кірпіш дүниеге» атты кітабын осында тұрақтаған отбасыларға тарту етті. Мұнымен қоса, оңтүстік өңірінен шыққан өнімдерді ұсынып, Түркістан облысының әкімі Өмірзақ Шөкеев үндеу тастаған «Қамқорлық» жобасын Солтүстікте жалғастырды. Сондықтан, қоныс аударған азаматтардың бүгінгі жағдайы туралы «Айғақ» телеарнасының арнайы бағдарламасынан алдағы уақытта жіберіп алмаңыздар!
Ордабасы ауданынан Жамбыл ауданына көшіп келген отбасылардың бірі Сырмановтар әулеті. «Еңбектің» шарапатын көрген олар жергілікті әкімдіктің көмегімен 2016 жылы Мамлют ауданына жайғасады. Көпбалалы отбасы бүгінде қос бірдей баспанаға ие болып, ірілі-ұсақты төрт түліктің басын түгендеп, жеке кәсібін өрге дөңгелетуде. Ал, отанасы Гүлшехан Сырманова 6 құрсақ көтеріп, балалар үйінің екі баласын да бауырына басқан. Еңбектің ебін тапқандар ендігі жерде балабақша ашуды жоспарлап отыр. 2000 шақырымдық жолды артқа тастап, азық-түлікпен артынып-тартынып жеткен біздерді сағынышпен қарсы алды.
