Арыс қаласының «Құрметті азаматы» Әбдіәшім Байбосынов өмірден өтті. Өнегелі өмір сүріп, ғибратты сөздерімен үлгі болған өнерпаз қария 93 жасқа қараған шағында көз жұмды.
Әуесқой сазгер Әбдіәшім Байбосыновтың алтынға айырбастамас бақыты — ұл-қыздары мен немере-шөберелері болатын. 11 перзент тәрбиелеп өсірген ақсақалды ұрпағы қаумалап, әрқайсысы өз шаңырағына алып кетіп, бәйек болып жүретін. Міне, бақыт.
«Алланың разылығы, ата-ананың разылығында» деген сөздің түп-төркінін түсінген адамға, терең мағына бар. Балалық шағы азалы жылдардың ашаршылық кезеңіне тура келгендіктен, Әбдіәшім ақсақал қиындыққа мойымаған, жігері жасымаған қайсар жан болды.
Әбдіәшім Байбосынұлының өмірбаяны туралы сөз қозғар болсақ, әңгіменің басы 1928 жылдан басталады. Дәл осы жылдың 1-шілдесі күні Арыс ауданына қарасты Оңтоғар бөлімшесінде дүниеге келген. Арыста орта білім, Алматыда жоғарғы білімді игергеннен кейін ұстаздық жолды таңдайды. Ілгеріде Арыс ауданы, қазір Ордабасыға қараған «Ақжол», «Жамбыл», «Сталин», «Ленин ту» бөлімшелеріндегі білім ордаларында мұғалім болып қызмет атқарды. Кітапханада меңгеруші, совхозда маман, партия ұйымында хатшысы, кәсіподақта төраға болып жұмыс істеген Әбдіәшім қария қай қызметте жүрсе де, ән айтуды ешқашан доғармапты.
Өнегелі өмір сүріп, өз ортасында сыйлы болып жүрген ел ағалары қаншама?! Қай өңірде де ойы жүйелі, сөзі киелі қариялар бар. Солардың қатарынан орын алатын Байбосынов Әбдіәшімнің өтірікке жаны қас. Жалған сөйлегеннің бетін тіліп түсетін туралығын, жерлестері жақсы біледі. Жасынан әкесіз өсіп, өмірдің ащы запыранын татса да, жасымаған адам. Сондықтан болар 1990-2005 жылдары «ауыл биі» қоғамдық қызметін атқарып жүрген жылдарда дауды тоқтатып, дана шешімімен талай жұртты татуластырған. Тоқсан ауыз сөздің тобықтай түйінін айта білген ақсақал әдемі өмір сүрудің сыры — өнерді шексіз сүйгенім деп кетті.
«Тәттімбет күй тартқанда, астындағы аты күйіне билеген. Құрманғазы күй тартқанда, қасқыр жүрісінен жаңылған» — деген сөз бар қазақта. Ал, Әбдіәшім ата қара домбыраны шерткенде бар дүниені ұмытып, тынысыңыз кеңейіп рухтанасыз. Жаны жайсаң жан еді. Ел ағасы, Арыс қаласының «Құрметті азаматы» Әбдіәшім Байбосыновтың жатқан жері жарық, топырағы торқа болсын!
