Қазығұрт десе, көз алдымызға бірден шыңында кемесі бар тау елестейтіні анық. Пайғамбардың кемесі қалған қасиетті тау әлемде санаулы ғана. Ілеуде біреудің басында болатын бақ біздің елде бар. Қиял-ғажайып аңыздарға толы мекенді 2016 жылдың сәуір айынан бастап Төлеген Телғараев басқарып келеді. Түлкібас ауданының тумасы Қазығұрт аймағының төрт жылда жоғын түгендеп, барын бағамдай алды ма? Сұраққа жауап қорытынды есептік кездесуде табылды.
Ташкент-Шымкент-Самара тас жолының бойындағы Қазығұрт ауданында 110 мың халық тұрады. Жаратқанның мейірімі түсіп, шапағатын шашқан мекен соңғы төрт жылда әлеуметтік мәселесін шешуге белсене кірісіпті. Таза су бойынша арыз-шағымын арқалап жүретін тұрғындар саны азая бастаған. Өйткені, жергілікті билік 2021 жылға дейін 61 елді мекенді таза сумен және табиғи отынмен қамту қажет деп, жоспарлы жұмыс жүріп жатыр. Нәтижесі қуантарлық. Белгіленген уақыттан бір минут кешікпей басталған аудан әкімінің қорытынды есептік кездесуінде осындай жаңалықтар айтылып, халықтың жүрегіне жол табатын баяндама жасалды.
Мамандығы инженер-механик, экономист-қаржыгер Төлеген Тұртайұлы мемлекеттік қызметте 1997 жылдан бері келеді. Облыстың қаржы басқармасында 20 жылдай тәжірибе жинаған Телғараев бюджеттің қаржысын қалай жұмсауды меңгерген әкім. «А» корпусының кадрлық резервінен өтіп, Қазығұрт ауданына келген бойда кезек күтпей тұрған мәселені қолға алыпты. Ішкі жолдарды жөндеп, инфрақұрылымды ретке келтірген. Жыл сайын 5-6 мектептің құрылысы жүретін Қазығұрт ауданындағы жұмыстар баяндалғанда тұрғындардың көңілі тоқ отырды.
Ауданның басты даму бағыты – ауыл шаруашылығы. Сондықтан, бұл аймақ көш ілгері жүріп, өткен жылы жетістіктерімен көзге түсті. Аты дардай алып кәсіпорын болмаса да, шағын және орта бизнестің арқасында Қазығұрттың қазынасына түсетін салық кем емес орындалып жүр. Бір жылдағы цифрлық оң өзгерістерді мәлімдеген әкім қағазға шұқшиып қарамай, жиылған жұртты қарата білді. Есептік кездесуде айтылатын сындар сап тиылған тәрізді. Бұдан әлеуметтік мәселенің азайып жатқанын ұқтық. Керісінше, сексеннен асып, тоқсанға таяған қариялар батамен биліктің өкілдеріне қанат бітіріп, алғыс айтты.
«Көп ойлап, жақсы сөйле нұсқа болсын, қайтарар жауабың да қысқа болсын» — деп Жүсіп Баласағұни айтқан тәлім-тәрбиеге қатысты ой есептік кездесуде еске түсті. Өйткені, жиналыста баяндама да, сұрақтар да қысқа-нұсқа. Тұрғындармен жиі кездесіп тұратын әкімнің есігі ашық екені байқалады. Бір сыдырғы мінезімен, қойылған сауалдарға байыпты жауап айтқан Төлеген Телғараевқа жұрт қанағаттанарлық деген баға беріп жатты. Өткен жылды түйіндеген бұл басқосуға Түркістан облысы әкімінің орынбасары Ұлан Тәжібаев қатысып, жерлестерімен қауышқанына қуанышты екенін жеткізді.
Облыс әкімінің орынбасары Ұлан Қалмұханұлы жастық шағында есінде қалған Қазығұрт ауданының тыныс-тіршілігін еске түсірді. Осыдан жиырма жыл бұрын әлеуметтік проблемасы шаш етектен болатын аймақтың әлеуеті жақсарғанына көз жеткізіп, түйген ойымен мінберде тұрып еркін бөлісті. Рухани аймақтан келген биліктің жауапты өкіліне сұрақтар қойылып, орайлы сәтті пайдаланғандар жауап алып үлгерді.
