Жаңа әкімнің қолына тұрғындар арыз ұстатты

Абай ауданының әкімі Ғалымжан Төлепов қорытынды есебін №52 мектепте ұйымдастырған. Бұл басқосуда жиылған жұрт күні кеше тағайындалған әкімді күтіп алаңдап отыр. Белгіленген уақытта қырық күн Шымкент қаласы әкімінің бірінші орынбасары болған Мұрат Әйтенов мегаполистің мэрі ретінде көтеріңкі көңіл-күймен кіріп келді.

Басын изеп тұрғындарға сәлем беріп жайғасқан қала әкімі баяндаманы ден қойып тыңдады. Осыдан кейін тұрғындар сұрақтың көкесін танытып, тыңдар құлаққа алтын сырға деп жатты. Орайлы сәтті орынды пайдаланған тұрғындар жеке бастың қамын күйттемей, толғандырып жүрген өзекті жәйтті ақтарды. ТМД-ның мәдени астанасы болған аймақтың халқы Ұлы Жеңістің 75 жылдығына орай Кеңес Одағының батырларына көңіл бөлінсе екен — дейді. Әлия Молдағұлова, Бауыржан Момышұлы, Қасым Қайсенов қаһармандардың есімі берілген көшелердің құлазып, жетімсіреп тұрғаны ұлы даланың ұрпағына сын.

Қаһармандардың есімі берілген көшелерге биыл көңіл бөлінсе құптарлық. Біріншіден бұл жеңісті жақындатқан батырларға көрсетілген құрмет, екіншіден 75 жылдыққа тарту болар еді. Жергілікті мемлекеттік басқару және өзін-өзі басқару туралы заңдағы 35-бапта қала, аудан, кент, ауыл әкімдері азаматтардың өтініштерін қарап, тиісті шаралар қолдану керектігі жазылған. Және әкімдердің міндетіне тазалық жұмыстарын ұйымдастыру да кіреді. Заң шеңберіндегі сол шаруаларды тұрғындар қайта еске салды.

Қоғамдық көлік қозғалысын ұйымдастыру да әкімдердің құзыретіндегі жұмыс. Жиынға мән берсек халықтың көпшілігі осы қоғамдық көлікке қатысты сын айтты. Сұрақ қойған бір емес, бірнеше тұрғын бұл күні жазбаша арыздарын Мұрат Әйтеновтың қолына тапсырды. Өзге қызметкерлерге сенбеген халық бұл іс-әрекетімен жаңа басшыға үлкен сенім артып отырғандығын аңғартты.

Әу, бастан мемлекеттік билік тармағы мен дін саласы егіз ұғым деуге келмейді. Алайда, мешітте уағыз айтып, ізігілікке жол сілтейтін имамдардың әкім есептерінде сағаттап отырғаны орынсыз сияқты. Діни қызметкер есеппен бас қатырғанша, дұрысы өз жұмысын жүйелегені абзалырақ. Өйткені, дін саласының көтерген жүгі де жеңіл емес. Бұл бағытта да мәселе шаш етектен.  Тұрғындар осы жәйтті жаңа әкім қаперіне ұсынды.

Түрлі мәселеден шаршаған тұрғындардың кейбірі ашуға беріліп жатты. «Қалауың тапсаң, қара жанар» — дейді. Абай ауданының тұрғындары көтерген шағымдарды қаланың әкімі Мұрат Дүйсенбекұлы қарап шығуға сөз берді. Жақсы сөз — шаршағанға медет, адасқанға жол, қаяу түскен көңілге дауа емес пе? Жиылған жұртта жаңа әкімнің ісіне сәттілік тілеп, құттықтап жатты.