Ағымдағы жылдың 18-21 желтоқсан күндері аралығында Түркістан облысы ПД-нің бастығы, полиция генерал-майоры Қ.Дәлбековтың тапсырмасымен Түркістан облысы аумағында «Қару» жеделдетілген-профилактикалық іс-шарасы өткізілген болатын. Осы орайда Бәйдібек АПБ-нің уақытша ұстау изоляторының бастығы, полиция капитаны Ғабит Құдайбергенов пен ЖПҚ УПИ полиция капитаны Думан Досбаевтар Бәйдібек ауданының таулы аймақтағы ауылдары мен елдімекендерінде заңсыз қарулардың сақталуы, пайдаланылуы бойынша рейдтік жұмыстар жүргізуге өткен аптаның жұма күні шыққан. Алайда ауа-райының қолайсыздығы салдарынан жұмыстарының бағыты өзгеріп, 3 күн қатарынан жол жабылып, өздері жаны қиналған жандарға көмек қолдарын созған.
Нақтырақ айтсақ, қалың жауған қар салдарынан батып қалған көліктен жолаушыларды түсіріп, аман-есен үйлеріне жеткізеді. Өз кезегінде, Бәйдібек-Ата ауылының тұрғындары полицейлердің жанашырлығына тамсанып: «Ауылдан Шымкент қаласына қарай жолға шыққанбыз. Алайда көлігіміз қарға тығылып қалып, жол үстінде қиналып қалдық. Қайта дәл уақытында полицейлер келіп, бізді шығарып, құтқарды.
Полицейлер болмаса, біз жолда, суықтан үсіп қалар едік. Тәртіп сақшыларына алғысымыз шексіз. Алла разы болсын!»-деп жүрекжарды сөздерін жеткізді. Осылайша, полицейлер Жарық бас ауылы мен Бәйдібек-Ата ауылын жалғап жатқан жол бойында жолаушыларға қолғабыс етіп, азаматтық жасады. Полицейлердің айтуынша, халыққа қандай жағдай болмасын бірінші кезекте көмек көрсету міндеттері. Олар үшін жұртшылықтың алғыс алып, қызметтерін мінсіз атқарудан артық биіктік жоқ. Түркістан облысы полицейлері азаматтарға сақ болуды және жол жүру ережелерін бұзбауды ескертеді. Алыс-жақын сапарларға шығарда көлігіңізді қамдаңыз. Сондай-ақ, полицейлер жүргізушілерге ауа райы нашар, боран болған кезінде жолға шығудан бас тартуға кеңес береді.
ТО ПД-нің баспаөз қызметі
