Тәуелсіздікте туылған талантты тәртіп сақшысы

«Отбасы деген әрбір адам үшін, ең жақын орта. Мен өз отбасымды құрметтеуді асқарым әкешімнен үйрендім. Ол кісі қайда жүрсе де отбасын бірінші орынға қоятын. Әкемнің осы бір жақсы қасиеті маған көбірек дарыған секілді. Мен де дәл солай әйеліммен қосақтасып, бірге ақылдасып шешім қабылдап, отбасымды бәрінен де жоғары қоямын. Екеуміз де полиция қызметкеріміз. Менің әкем ішкі істер органдары саласында қызмет атқарған, бүгінгі таңда зейнетке шыққан полицей. Жұбайым екеуміз сол әкеміздің жолын жалғап, елімізге барынша адал қызметімізді арнап келеміз. Өздеріңіз білесіздер біздің салада уақыт тапшы. Алайда сүйген жарыңа үйленіп, шаңырақ көтергеннен соң жауапкершілікті сезініп, отбасын айрандай ұйытып отыру отағасына, соның соңғы болып қабылдайтын шешіміне байланысты деп ойлаймын», — дейді 3 баланың әкесі, Жетісай аудандық полиция бөлімі Жергілікті полиция қызметі ювеналды полиция тобының инспекторы, полиция капитаны Азамат Сағдатұлы.

Жалпы бүгінгі сіздерге таныстырғалы отырған кейіпкерімнің әңгімесіне қарап, оның қандай жан екендігін одан әрі де білгілеріңіз келіп, қызығушылықтарыңыз артып отырған болар. Ендеше Азаматтың өмірі жайлы сыр шертуді бастайын.
Салтөреев Азамат Сағдатұлы 1991 жылы ақ мақтаның ордасы Жетісай қаласында полицей отбасында дүниеге келген. Дәл сол жылы егемендігімізді алып, ел еңсесін тіктей бастаған, қазақ үшін ұмытылмас жылдар болып саналған тәтті кезеңде Салтөреев Сағдат пен Үміт Асанованың отбасында екінші бала болып дүниеге келді.
Тәтті Тәуелсіздік таңында дүние дидарын ашқан Азамат мектепте орта білімін алып, ойдағыдай тәмамдағаннан соң шырайлы Шымкент қаласында, онан соң Хакім Абайдың өлкесі Семей қаласында өзінің жоғарғы білімін шыңдай түсті. Заңгер мамандығын ойдағыдай игерген жас жігіт, қызметке орналасып, полицей боламын деген арманын іске асыруға ұмтылады. Осылайша азамат арман қуып Мақтаарал аудандық полиция бөліміне учаскелік полиция инспекторы болып алғашқы қызметіне орналасады. Өз ісін меңгере бастаған уақытта басшылардың ықпалымен одан әрі жоғарылап, Жетісай ауданындағы полиция бөліміне ювеналды полиция тобына жұмысқа ауысады. Осы сәтте небары бір жылдық қызметтік тәжірибесі бар жас полицей өзінің өмірлік жары болатын Динаны кездестіреді. Азамат үшін махаббат қызық мол жылдар басталады. Өзінің ұнатқан аруына жұмыспен қатар жүріп, көңіл бөліп, ақыры бір жылдан соң бақ құсын қолына қондырады.

Осылайша Салтөреевтер әулетінде дүркіреген той өтеді. Дүбірлі тойда «Үлгілі полицейден екінші бір үлгілі полицей шығып, мінеки бүгінде өзі секілді полицей аруды жар етіп отыр. Екеуіңнің де бақыттарың баянды болып, полицей ұл-қыздарды дүниеге әкеле беріңдер деген ізгі тілектер айтылады».
«Жақсы сөз- жарым ырыс» демей ме, дана қазақ. Сол күнгі тілектер орындала бастағандай. Себебі бүгінде ерлі зайыпты полицейлер отбасында екі ұл мен бір қыз дүниеге келіп, атасының, әкесінің жолын жалғағысы келетіндей «өскенде полицей боламын» деген батырлар өсіп келеді.

Азаматтың жары Дина Аубакирова 1992 жылы Солтүстік Қазақстан облысы Шалақын ауданында өмірге келген. Әкесі секілді полицей болып, форма киюді армандаған қыз өсе келе жоғарғы оқу орындарын заңгер мамандығы бойынша жақсы көрсеткішпен аяқтап, қызметке орналасып, бүгінде жұбайы Азаматпен бірге ішкі істер саласында қызмет етіп келеді. Ерлермен иық тірестіре еңбек етіп, қызметіне жауапкершілікпен қарап, кәсібіне адалдық танытып жүрген ару полицей десек те артық бола қоймас.
«Қызметім өзіме ұнайды. Азамат секілді мен де өз мамандығымды сүйгендіктен қызметіме және осы маман иесі болғаныма еш өкінбеймін. Қиындық кез-келген жерде болады. Әр саланың өз қыр-сыры бар. Сондықтан әйел заты болсам да темірдей тәртіпке етім үйренген. Қайта әйел затымын деп көп еркелемеймін, айттым ба сол сөзімді міндетті түрде орындаймын. Уәдеге берікпін десем де болады.

Ал отбасыма келер болсам. «Әйелдің қырық жаны бар», деп бекер айтылмаған ғой. Сондықтан барлығына үлгеруге тырысамын. Жұмыстан қолым босап қалт ете қалса болды, үйімнің тірлігін жоспарлаймын, балаларымды қадағалаймын. Ал жұмыс аяқталғанда міндетті түрде үйге қарай асығамын, тездетіп тамағымды әзірлеп, ерімнің көңілін табу үшін барымды саламын.», — дейді пысық келіншек Дина.

Тәуелсіздікпен түйдей құрдас Азамат өз іскерлігінің арқасында басшылардың көзіне түсіп, 10-нан астам марапат мадаққа ие болған маман. Азаматтың жұмысы тығыз, бос уақыты аз болса да спортпен шұғылдануға үнемі уақыт табады. Сонымен қатар бүгінде тәжірибесі толысып келе жатқан тәртіп сақшысы өз алдына талантты. Өзіне дарыған актерлік шеберлігінің арқасында республикалық, облыстық жарыстарға қатысып, өзін жан-жақты қырынан көрсетіп, бірнеше мәрте жүлдемен оралған. Ішкі істер органдарының қызметкерлері арасында болатын «Парасатты полицей» секілді жоғары деңгейлі сайыстарға да белсенді қатысып, тек жоғарғы орындарға ие болған.

Қазақ елі өз Тәуелсіздігіне қаншалықты қиын қыстауларды бастан кешіре отырып, табандылықпен жетіп, елге 28 жыл ішінде аса танымал болып, дамыған елдер қатарына қосылып келе жатса, онымен түйдей құрдас терең ойлы Азамат Сағдатұлы да еліне өз қолынан келгенше еңбек сіңіріп, міндетін мүлтіксіз атқарып, оған қоса жас та болса бас болып демографияға өз үлесін қосып келе жатқан үлгілі полицей.

 Өз кезегімізде біз де осындай ерекше талантты тәртіп сақшысы, өнегелі қызметкер, ардақты отағасына толағай табыс пен ел алдында абыройың асқақтай берсін дегіміз келеді. Тәуелсіздігіміз тұғырлы, еліміз аман болсын!

Гүлнар Абдурахманқызы,

Түркістан облысы Полиция департаменті