Елі құрметтеген — ер есімі ұмытылмайды. Сөзімізге дәлел ретінде Сайрам елді мекенінде ашылған «Ерлер қорымы» белгітасын айтуға болар. Естеріңізде болса, 2015 жылы Сайрам шайқасының сардары Тілеу Айтұлы мен ұлы Жолдаяқ Тілеуұлына арнап Шымкентте ескерткіш ашылған болатын. Қажымұхан атындағы орталық стадионда тұрған сол батырлардың құрметіне орай, енді Сайрам жерінде тағы бір белгі пайда болды.
Мегаполиске қосылған Сайрам елдімекеніндегі Сареми көшесінің бойындағы «Ерлер қорымы» — тарихи ескерткіштің қатарын толықтырды. Бұл біріншіден, Тәуелсіздіктің жемісі. Әйтпесе, бұған дейін Кеңес үкіметінің тұсында осы батырлардың ерлігі тұрмақ, есімдері айтылмайтын. Енді алты алашқа әйгілі би, әрі батыр қолбасшы Тілеу Айтұлы бастаған сарбаздар жатқан зират маңында ұрпағы еркін танысып, тарихты оқып өтетін белгі тас ашылып отыр.
1681-1684 жылдардың шамасында жоңғарлар ислам дінін таратушы орда, әсем шаһар Сайрамды басып алған. Сонда Тәуке хан қазақ елінің батырларына бір тудың астында жиналуға әмір етіпті. Сайрамды азат ету мақсатында Батыстың Ақтөбе аймағынан 17 мың қолды басқарып, қолбасшы Тілеу, немере інісі Қалдыбай, бел баласы Жолдыаяқ келіп қосылады. Ел мен жер үшін күрескен 11 мың сарбаз Сайрам топырағында мәңгі тыныстаған. Ал, Тәуке ханның пәрменімен Тілеу мен Жолдыаяқ батырдың сүйегі Түркістан қаласындағы Яссауи кесенесінде жатыр.
