Отырарда «Алтын күз» мерекесі тойланды

Отырар ауданында ауыл шаруашылығы еңбеккерлерінің дəстүрлі «Алтын күз» мерекесі кең көлемде аталып өтті. Ала жаздай дала төсінде тер төгіп еселі өнім жинаған жергілікті диқан қауымының мерекесі Шəуілдір елді мекеніндегі орталық алаңда ұйымдастырылған ауыл шаруашылығы өнімдерінің жəрмеңкесінен бастау алды. Отырар ауданына қарасты 13 ауылдық округтен келген шаруалар бұл күні азық-түлік тауарларын жергілікті нарықтан 15-20 пайыз төмен бағада саудалап, тұрғындарға ұсынды

Жәрмеңкеде 5 тонна ұн, 3 тонна картоп, 1,5 тонна сәбіз, 2 тонна пияз секілді бақша дақылдарымен қатар, ауданның ерекше сұранысқа ие өзіндік айрықша тауары қымыран өнімдері мен қауыннан жасалған «қауын қақ», «қауынқұрт» және ет өнімдері, сондай-ақ тары, талқан, құрт, ірімшік сынды тауарлар тұрғындар сұранысына ие болды. Ал, жəрмеңкені аралап көрген Отырар ауданының əкімі Əбдіғали Жүнісов ауыл еңбеккерлерін алтын күз мерекесімен құттықтады.
Айта кету керек, Отырар ауданы бойынша биыл 33 мың гектарға жуық егістік жер игерілсе, оның 11 мың гектары жүгері дақылына тиесілі. Бұл тұрғыда жүгері өнімділігін арттыруда жүйелі жұмыс жасап жоғары нəтижеге қол жеткізген. Отырар ауданында облыс тарапынан берілген барлық индикаторлар өз денгейінде орындалған. Бұл туралы аудандық ауыл шаруашылығы бөлімінің басшысы Батырбек Сыздық мəлімдеді.

Ал, бұл күнгі мерекелік шара барысы əрмен қарай үш жақты келісімге сəйкес шаруашылықтың барлық салаларында жетістікке жеткен ауылдық округ əкімдері мен еңбек озаттарын марапаттауға ұласты. Сонымен «Алтын күз 2019» мерекесінде ауыл шаруашылығының барлық көрсеткіштерін жоғары денгейде орындаған Жаңа Шілік ауылдық округі бірінші орынға ие болса, екінші орын Маяқұм округі, ал үшінші орынға Көксарай ауылы лайық деп танылды. Еселі еңбектеріне сай аудан əкімінің алғыс хаттары мен бағалы сыйлықтарына ие болған шаруалар қауымының шаттыққа толы мерекесі концерттік бағдарламаларға ұласты.