Төлеби ауданында өткізілетін «Ақ бота» жасөспірімдер өнер байқауына биыл — 25 жыл. Әр жыл сайын ауқымын кеңейтіп келе жатқан аудандық байқауға бұл жолы 1500 үміткер бала қатысып, ақтық сынға 140 өнерпаз іріктеліп алынған. Қатысушылар байқаудың соңғы кезеңінде Түркістан облыстық Ш. Қалдаяқов атындағы Филармония әншілерінің алдында өнер көрсетті.
13 жасқа дейінгі жеткіншектер қатысатын «Ақ бота» байқауы осы күнге дейін көптеген әншілердің жарқырап жануына, үлкен сахнаға шығуына көптеген септігін тигізген. Бүгінгі байқаудан да бірқатар балалардың жұлдызы жанары анық. Себебі, жас өнерпаздардың аяқ алысы мен ынтасы ерекше. Бірін-бірінен озып тұрған үміткерлердің арасынан жеңімпазды анықтау — әділқазы алқаларына оңайға соқпас. Дегенмен де, бүгінгі жарыста нағыз мықтылардың бәйгесі оза шаппақ.
