Түркістан қаласында облыстық ардагерлер кеңесінің кеңейтілген төралқа мәжілісі өтті. Күн тәртібінде, Мемлекет басшысы Қ.К.Тоқаевтың «Сындарлы қоғамдық диалог-Қазақстанның тұрақтылығы мен өркендеуінің негізі» атты халыққа арнаған Жолдауы мен «Әкелер мектебін құру» туралы мәселелер қаралды.
Қазақстан Республикасының Президенті Қасым-Жомарт Тоқаевтың Қазақстан халқына арнаған Жолдауы негізінен елдің табысын арттырып, тұрмыс сапасын жақсартуға арналып отыр. Халықтың әлеуметтік жағдайының артуы да еліміздің экономикалық дамуына әсер етеді.
Аталған Жолдауда экономикалық даму, әлеуметтің әлеуетін көтеру, адам денсаулығын нығайту, білім сапасын жақсарту сияқты еліміз үшін маңызды бастамалар бар. Сонымен қатар, Президент көпбалалы отбасылардың әлеуметтік жағдайын жақсартуға байланысты үй мен қамтамасыз етуді тапсырды. Көпбалалы және әлеуметтік жағдайы төмен отбасылардың балаларына тегін оқу грантын бөліп, оларды жатақханамен қамтамасыз ету мәселесі қаралды. Мектептерде оқулықтың сапасын арттыруға байланысты оқулықты қайта жазуға ұсынды. Оқушыларды жазғы демалыс кезінде лагермен қамтамассыз етуді тапсырды. Мұғалімдер мен оқушылардың жағдайын жақсарту үшін ұстаздардың жалақысын 25 пайызға арттыруды тапсырды. Бұл дегеніміз ұстаздардың жалақысы төрт жылдың ішінде жүз пайызға артады деген сөз. Бұл ұстаздар үшін өте қуанышты жаңалық екені даусыз. Мұғалімнің жұмысқа деген құлшынысы артатыны белгілі.
