Қасиетті құрбан айт мерекесінде Арыс қаласына қарасты 25 мешіттің іші-сырты жамағатқа толы болды. Бұл күні қала әкімі Мұрат Қадырбек және ҚМДБ Түркістан облысының өкіл имамы Мұсабек Ақтамберді Арыстағы 1000 адамға шақталған «Ысқақ» мешіттің жамағатымен бірге айт намазын оқыды.
Ұлық мерекеге орай құлшылық үйінде қой сойылып, ұлттық ойын түрлерінен жарыстар ұйымдастырылды. Бұл күндердің ұлықтығы сол — мұнда адам баласы өз Жаратушысына барынша жақындауға мүмкіндік алады. Асылы, «құрбан» сөзі де араб тілінен аударғанда, «жақын болу», «жақындау» мағынасын білдіреді. Олай болса, құрбандық шалу ғана емес, Алланың рақым-мейіріміне қол жеткізудің бір жолы деп түсінген абзал.
«Құрбан айт» мейрамының жамағат арасындағы бірлікті күшейтіп, бауырластықты арттырудағы рөлі аса зор. 
Айт намазын оқуға мешітке келген мұсылмандар бір-бірімен көрісіп, қабыл болсын деу арқылы достық пен ағайындықты нығайта түседі. Мерекенің алғашқы күні ертерек тұрып, ғұсыл алып, таза киім киіп, қош иісті әтір сеуіп, көшеде жолыққан адамға ашық жүзбен сәлемдесу, құрбандық етімен ауыз ашу үшін айт намазының алдында ештеңе жемей, оған бара жатқанда тәбір айту — хазіреті Мұхаммед (с.ғ.с.) пайғамбарымыздың сүннеті.
«Айғақ-Ақпарат»
