Бүгін Оңтүстік жұрты мемлекет және қоғам қайраткері, еңбек ері, Оңтүстік Қазақстан облысының және Шымкент қаласының «Құрметті азаматы» Сатыбалды Ибрагимовпен қоштасты. Марқұмды ақтық сапарға шығарып салу рәсімі Сайрам ауданының Қарасу ауылында, өз шаңырағында өтті.
Мемлекет және қоғам қайраткері Сатыбалды Тілемісұлының қайтыс болуына байланысты ҚР Тұңғыш Президенті — Елбасы Н.Ә.Назарбаев пен Мемлекет басшысы Қасым-Жомарт Тоқаевтың көңіл айту жеделхатын Шымкент қаласының әкімі Ерлан Айтаханов оқып берді.
Сондай-ақ, қаралы митингке зиялы қауым өкілдері, ҚР Парламенті Сенатының және Мәжілісінің депутаттары қатысты.
Сатыбалды Тілемісұлы Ибрагимов 1940 жылы Оңтүстік Қазақстан облысы, Сайрам ауданы, Қарасу ауылында дүниеге келген. ҚР Парламенті Мәжілісінің 4-ші шақырылымының депутаты болды. Украинаның Днепродзержинск қаласындағы №8 кәсіптік-техникалық училищеде Қазақстан Республикасының Тұңғыш Президенті Нұрсұлтан Назарбаевпен бірге білім алған. Мәскеу қаласындағы П.Лумумба атындағы Халықтар достығы университетін бітірген.
Еңбек жолын Теміртау қаласындағы Қазақстан магниткасында болат қорытушы болып бастап, басшылық қызметтер атқарды. 1988 – 2000 жылдары «Қазақаймақ» фирмасының вице-президенті, «Кармет-Оңтүстік» фирмасының президенті, бас кеңсесі Лондон қаласындағы «Успатниттің» Теміртау қаласындағы өкілі, «Қазхром» компаниясының президенті болды. 2001 жылдан Еуроазиялық өндірістік ассоциация төралқасының мүшесі болатын.
Суреттер: «Шымкент келбеті» газетінің интернеттегі парақшасынан алынды
«Айғақ-Ақпарат»
