Шымкент қаласының іргесінде инфрақұрылымы жоқ елді мекендер жетерлік. Мәселен, 195-ші орамдағы Бадам шағын ауданында баспаналар тізіліп салынып жатыр. Бүгінге дейін 300 үй тұрғызылған. Бірақ «айдалада ақ отау, аузы мұрны жоқ отау» болып тұр. 1280 тұрғын тұратын аймақта ауыз су тартылмаған, жол туралы қозғаудың өзі әлі ерте сияқты. Инфрақұрылымы шешілмей жер берілген аймаққа барған Ерлан Айтаханов халықпен кездесіп, ұсыныстарына құлақ түрді.
Өткен аптада Ерлан Қуанышұлын қабылдаған Президент Қасым-Жомарт Тоқаев Түркістан облысынан Шымкентке қосылған 41 елді мекенді дамытуды тапсырған болатын. Осы бағыттағы жұмыстарды жандандыру үшін мегополис әкімі мәселесі тұнып тұрған аймақтарға кірісті. Тұрғындармен жүздескен сәтте қиял-ғажайып әңгімелерді тоқтатып, шындыққа жанасатын істі айту керек — дейді. Айтаханов қарамағындағы қызметкерлерге өтініш айтты. «Халықты алдамау керек. Инфрақұрылымды бүгін, ертең шешем деп уәде бермеймін. Бірақ, қаражатты барынша тартуға тырысамыз,» — деді.
Сәуле шағын ауданындағы 276 орамда мәз емес. Аты қала болғанмен, заты ауылдан бетер жерде қазір 680 халық тұрып жатыр. Қыр үстіне үй салғандар өздері үшін емес, бүлдіршіндер үшін алаңдап отыр. Мектепке бару оңай емес. Тым болмағанда қоғамдық көлікті шешіп берсе деген ұсынысы бар. Қаланың әкімі тұрғындармен жүздесу сәтінде тек мәселені тыңдап қана қоймай, кеңесте айтып жүрді. «Алма піс, аузыма түс» деп отыра бермей, қимылдау керек. Мемлекет тарапынан беріліп жатқан көмектерді пайдаланып, бизнес ашуға шақырды.
