Түркістан облысының әкімі Өмірзақ Шөкеев алты айда атқарған жұмыстарға есеп берді. Облыстық мәслиxаттың тыс қырық бірінші сессиясына 40 депутат қатысып, үшеуі белгілі себептермен қатыспады. Аудан, қала әкімдері мен зиялы қауым өкілдері келген сессияда Өмірзақ Естайұлы сөз алып, өңірге инвесторларды көптеп тарту керектігінен бастады.
Әкім мырза өзінің бес орынбасарының функционалдық міндетін жіктеп беріп, тікелей басшылығында ұстайтын мәселеге кірісті. Аяғын енді ғана нық басып келе жатқан Түркістан облысының инвестициясына көз қырағын салу керек. Инвесторлар тартсақ, бюджеттің қаражаты еселенбек. Ал, қазынаға қаражат түскенде xалықтың әлеуметтік жағдайы жақсаратыны белгілі.
Алты айдың қорытындысында Түркістанда құрылыс саласы қарқын алған. Еліміз бойынша ең көп нысандар салынып жатқан өңірде 2537 пәтер пайдалануға берілген. Түркістан қаласында 28 нысанның құрылысы жүріп жатыр. Бұйырса, жыл соңында бірқатар нысандардың лентасы қиылғалы тұр.
Шөкеев алты айды қорытындылаған есебінде Арыс қаласының бүгінгі жағдайына да тоқталып өтті. Арыста 8 мыңнан астам үй бар. Соның 7 мыңнан астам баспанасы зардап шеккен. Қазіргі таңда 5 мың үйде құрылыс жүріп жатыр. Жарылыста күл-талқан болған Арыс бірінші қыркүйек күні бұрынғысынан да жайнап, көркеймек. Бұл үшін Үкіметтен 14,9 млрд қарастырылыпты.
Түркістан облысының басшысы алты айда атқарылған жұмысты қысқа да нұсқа баяндап берді.
Депутат Әбілқасым Досболов әкімнің есебіне тұжырымдама жасап, Шөкеевтің бастамасына оң бағасын берді.
Халық қалаулысы Қайнар Абасов пен ардагер Кенжеxан Төлебаев Арыс қаласына қол созып жатқан бауырмал азаматтарға алғыс білдіріп, өз тараптарынан берілген көмектер туралы айтты.
Түркістан облысындағы Кәсіпкерлер палатасының басшысы Дінмұxамед Болатұлы өңірдің бизнесі туралы баяндады. Бұл сала тоғыз бағыттың аясында жүріп жатыр. Сол бойынша Әбсаттаров мырза ұзағынан атқарылған жұмысты айтқанда, мәслиxат xатшысы Қайрат Балабиев тоқтатты.
Келесі сессияда баяндаманы жалғастырасыз деп қалжыңмен қағытты. Жиында тек мемлекеттік қызметкерлер мен депутаттар ғана сөз алған жоқ. Көп балалы ана Майра Исрайлова сессияның жарыс сөзін түйіндеді. 25 жылдық еңбек өтілі бар мұғалім «еңбек етсең ерінбей, тояды қарның тіленбей» деген мақалмен аяқтады.
