Бүгін Арыс қаласында ауылшаруашылық өнімдерінің қайырымдылық жәрмеңкесі өтуде.
Ағымдағы жылдың 24 маусымында Арыс қаласында орын алған апат еліміздің халқын бей-жай қалдырмады. Еліміздің түкпір-түкпірінен жәрдем қолдары созылды және әлі де жалғасып жатыр.
Әрине, «Тас түскен жеріне ауыр» демекші, іргелес жатқан аудан, қалаларда бұл кезде көмек қолдарын созудан тыс қалмады. Ал көп ұжым өздерінің бір күндік жалақыларын арыстықтарға жөнелткен болатын. Оның ішінде Түркістан облыстық ауылшаруашылық басқарамасының қызметкерлері бар.
Міне, бүгін Түркістан облысының әкімі Өмірзақ Шөкеевтің бастамасымен Арыс қаласында Түркістан облысының тауарөндірушілері өндірген ауыл шаруашылығы өнімдерінің жеңілдетілген бағадағы жәрмеңкесі өткізілуде.
Жәрмеңкеге 50-ге жуық тауарөндірушілер қатысып, 200 тоннаға жуық ауылшаруашылық өнімдерін ұсынып отыр. Өнімдер базар нарқынан 30 % төмен бағада ұсынылды.
Жәрмеңкеге жеткізілетін өнімдер барлық аудан, қалалардың даму басымдықтарына сәйкес өндіріліп, жинақталған.
Сонымен ет және ет өнімдері бойынша Бәйдібек, Қазығұрт, Ордабасы, Отырар, Сайрам, Созақ, Түлкібас, Төлеби және Шардара аудандары өз үлестерін қосып жәрмеңкеге 40 тоннаға жуық өнімдерін жеткізсе, көкөніс бойынша Қазығұрт, Келес, Мақтаарал, Жетісай, Ордабасы, Сайрам, Сарыағаш, Түлкібас, Төлеби аудандары Кентау қалалары 55 тонна көлемдегі көкөністерін ұсынды.
Сүт өнімдерінен Ордабасы ауданы — 10,7 тонна, Қазығұрт ауданы — 1 тонна, Отырар ауданы — 5 тонна алып келсе, Сайрам ауданы — 3,7 тонна, Созақ ауданы — 2 тонна, Төлеби ауданы — 2 тонна алып келді. Жалпы көлемі 24,4 тонна сүт өнімдері жеткізілді.
Ал, бақша өнімдерінен Жетісай ауданы — 20 тонна, Мақтаарал ауданы — 11 тонна және Шардара ауданы — 10 тонна өнім алып келді.
Бұдан бөлек, облысымыз ауыл шаруашылығы саласының түрлі бағыттарында жұмыс істейтін ірі кәсіпорындар өз өнімдерін жәрмеңкеге алып келеді. Атап айтқанда, «Аманкелді» ЖШС, «Асыл тұқымды Ордабасы ешкі сүт өнімдері» ЖШС, «Бөрте милка» ЖШС, «Dala fruit.kz» ЖШС, «Қайып ата» ЖШС, «Ордабасы құс» «Хамит» СТК сынды бас-аяғы 22 кәсіпорын өз өнімдерін ұсынды.
Төлеби ауданының бір топ өнерпаздары күні бойы Арыс қаласының тұрғындарына өз концерттік бағдарламаларын ұсынды.
