Бүгінгі түлек — ертеңгі тірек

Мемлекетіміздің Тұңғыш Президенті – Елбасы Нұрсұлтан Назарбаев «Ұлы Отырар қазақ өркениетінің алтын діңгегі» деп айрықша атап өткендей сұлу Сыр мен әсем Арыс өзендерінің түйіскен тұсына орналасқан Отырар елі тұнып тұрған шежіреге толы. Олай дейтініміз, әлемге танымал ғұлама ғалым – Әбу Насыр әл-Фараби осында туыл­ған. Күллі мұсылман дүниесінің ардақтысы – Арыстанбаб осында жерленген. Тәуелсіз еліміздің Әнұранының авторы Шәмші Қалдаяқовта шыр етіп осынау киелі өңірде дүниеге келген. Сондай-ақ өз зерттеуін күтіп жатқан «Алтынтөбе», «Пышақшы төбе», «Қалам төбе» секіл­ді сырын ішіне бүккен дархан дала жәдігерлерінің де айтары көп. Міне осынау киелі өлкеде, тек қана ұлылар ғана емес, сонымен қатар білім саласы жағынанда алдыңғы қатарлардың бірінде келе жатыр десек, артық айтқанымыз болмас.

Осы жыл Отырар ауданы үшін білім саласы бойынша жетістікке толы жыл болды.
Отырар өңірінде былтырғы жылы ҰБТ нәтижесі бойынша облыста көш бастап, 31 оқушысы «Алтын белгі», 11 оқушысы «Үздік аттестат» иегері атанған болатын. Ал, биылғы жылы аудан бойынша 26 түлек «Алтын белгі», 26 түлек «Үздік аттестат» иегерлері болды.

Бүгінгі күн ерекше деп айтсақ болады. Он бір жыл бойы алған білімдерін сарапқа салатын ҰБТ-ға қатысып, білім шыңын бағындырған, жоғарғы көрсеткіштерге қол жеткізген жас түлектерді Отырар ауданының әкімі Ерлан Қуанышұлы арнайы қабылдап, ұрпағына рух берген Ұлылар мекені отырарлық түлектерге деген шын жүректен ізгі ықыласын білдіріп, құттықтау сөздерін жеткізді.

Әдемі де, әсерлі көңіл-күймен басталған жылы жүзді қабылдауда аудан басшысы: «Мемлекетіміз жас ұрпақ тәрбиесіне, білім беру ісіне ерекше назар аударып, Сендердің сапалы білім алып, үлкен азамат болуларың үшін барынша жағдай жасап отыр. Еліміздегі игiлiктердiң барлығы елдiң болашағы — жас ұрпақтың келешегi жарқын болуы үшiн жасалып жатқаны белгілі. «Ауылына қарап, азаматын таны» деген, сендер қайда жүрсеңдер де туған ауылымыздай сынды келешегi кемел, өрiсi кең құшақтан шыққандарыңды ұмытпауға, туған жер, өскен орталарыңды мақтан етуге тиiссiңдер. Туған жеріміздің мәрте­бесiн арттыратын сендерсiңдер, жас түлектер!
Биылғы жылғы түлектер түрлі деңгейдегі білім бәсекесіне қатысып, жақсы жетістіктерге жетті. Балалық шақтан болашаққа қадам басқан жалынды жастар ауданымыздың білім саласындағы беделінің артуына өзіндік үлестерін қосты. Ел ертеңі, тәуелсіз елдің жастары — Сендерсіңдер. Сондықтан да жауапкершілікті сезініп, сенім биігінен көріне беріңдер»- деген жылы лебізін білдірді.
Кездесу барысында талай додалы сыннан сүрінбей өткен түлектерге аудан басшысы туған жердің тарихын танып, білу мақсатында қазақтың бойтұмары — Отырардың ерекшеліктері жөнінде сауал жолдады. Жамбыл мектебінің бітіруші жас түлегі Амандос Раманқұлға еш мүдірместен жауап бергені үшін «Білім – теңіз, мектеп — кеме» деген қанатты сөзге мән бере отырып, желкенді кеменің макетін естелік ретінде сыйға тартты.
Аудан әкімінің жүрегінен шыққан ақ тілектері мен ізгі ниеттеріне көңілдері толып, жүздерінен бұл-бұл жайнаған қуанышты сәттерін түлектер естелікке суретке түсіріп алды.

Отырар ауданы әкімінің баспасөз қызметі