Арыс қаласында орын алған төтенше жағдай әсіресе балалар үшін оңай болмады. Балабақша бүлдіршіндерін ұжым болып ұйыған тәлімгерлер дер кезінде апат алаңынан алып шықса, бас сауғалаған арыстық тұрғындардың жапа тармағай әрекеті балалардың да көз алдынан кете қойған жоқ. Қазіргі таңда жұрт болып жұмылып, тоғыз жолдың торабында орналасқан Арысты қайта қалпына келтіру жұмыстары қарқынды жүргізіліп жатыр. Ал Үкімет басшысы Асқар Маминнің тапсырмасына сәйкес, төтенше жағдайдан зардап шеккен қаланың 4 мың баласы сауықтыру лагерьлеріне жіберілу керек болатын. Бұл міндетті асқан жауапкершілікпен қабылдаған еліміздің әр өңірі балалардың демалысын ұйымдастыруға жедел кірісіп кетті. 
Яғни, Арыс қаласындағы апаттан зардап шеккен 223 бала жолдамамен Жамбыл облысындағы сауықтыру лагерьлеріне жайғастырылған. 
һДемалушылардың алғашқы легі 28 маусымда келсе, 4 шілдеде екінші лек жіберілді. Барлығы да балалардың болашағы үшін!
Осы тұста, «Айғақ» арнасы Жамбыл облысына арнайы барып, балалармен кездесіп қайтты. 
Айта кетейік, Арыс қаласынан аттанған 223 баланың 32-сі Жуалы ауданына қарасты «Тау самалы» лагеріне жіберілсе, Мерке ауданының «Жұлдыз» демалыс орнында 31 бала және Байзақ ауданындағы лагерьде 21, 107-і бүлдіршін «Болашақ» лагерінде демалуда.
Түркістан облысынан Әулиеата жеріне арыстық балалар үшін арнайы барған «Айғақ» арнасы олардың керемет уақыт өткізіп жатқандығының куәсі болды. Қосымша киімдер мен қажетті заттарды Жамбыл облысының әкімдігі ұйымдастырып, қамтамасыз еткен.
Енді, Арыстық жасөспірімдер 30 күн бойы көрші аймақта жазғы уақыттарын қызықты әрі тиімді өткізетін болады.
«Айғақ-Ақпарат
