Өмірзақ Шөкеев арыстық кәсіпкерлермен кездесті

Түркістан облысының әкімі Өмірзақ Шөкеев Арыстағы кәсіпкерлермен кездесті. Бүгінде Арыстағы кәсіпкерлердің мәселесін шешу үшін «Атамекен» кәсіпкерлер палатасынан 25 қызметкер келіп, 17 секторға бөлініп қызмет атқаруда. 10 күн ішінде төтенше жағдай салдарынан шығынға ұшыраған кәсіпкерлердің өндірісін бағалауды аяқтайды. Сондай-ақ, қазір 346 коммерциялық нысан анықталған. Оларды қайта тіктеу үшін 10 кешенді шара іске асырылмақ. Яғни, 5 млн-ға дейін жеңілдетілген несие беріледі. Ол үшін арнайы «Қамқор» бағдарламасы құрылған. Қазірдің өзінде 2 кәсіпкерге 5 млн-нан 10 млн-ға дейін несие беруді қолдаған. «Шешім тез қабылданады», — дейді басшылар. Жеңілдетілген несие беру үшін жергілікті бюджеттен 200 млн. қаржы бөлініп отыр. «Даму» қорынан қосымша 300 млн. қарастырылады.
Сондай-ақ, алдағы уақытта Арыста бірнеше инвестициялық жобалар іске асырылатын болады. Құны 100 млрд. теңгені құрайтын 14 жоба іске асырылады. Негізгі басты жоба, Арыста вагон шығаратын өндіріс ошағы салынбақ. Нәтижесінде, 2000 адам жумыспен қамтылатынын мәлімдеді басшылар.
Соңынан тұрғындар өздері тарапынан облыс әкіміне сұрақтарын қойды. Төтенше жағдай салдарынан келгкн зиянды толық қалпына келтіріп, сынған, құлаған нысандарды қайта қалпына келтіреміз, ал мүлде жарамайтын ғимараттарды қайта салып береміз деп уәде берді.

«Айғақ-Ақпарат»