Шымкенттегі оқшаулау орталықтары тұрақты жұмыс жасап жатыр

Арыс қаласында орын алған төтенше жағдайға байланысты Шымкент қаласында 15 эвакуациялық көшіру, жиналу пунктері құрылған болатын. Негізінен мектептер жанындағы орталықтарға қазірге дейін Арыс қаласы аумағынан жалпы саны 2925 адам жайғастырылған. Ал, олардың 976 балалар. Бұл туралы Шымкент қаласының ТЖД бас маманы Зарипа Тұрысбекова мəлімдеді.
Айталық, Шымкент қаласының «Тұрлан» шағын ауданындағы № 55 мектеп жанынан ашылған арнайы пункте де дəл қазір апат аймағынан эвакуацияланған азаматтар жайғастырылған. Мектеп директоры Гүлмира Оралбаеваның айтуынша, білім мекемесінде жұмыс жасайтын 150-ден астам қызметкер толық жұмылдырылып, осында жайғасқан азаматтарды тіркеу, қабылдау жұмыстарымен айналысып жатыр.  Бүгінгі таңда мұнда арнайы медицина қызметкерлері кезекшілікпен жұмыс жасап жатса, еріктілер мен кəсіпкер азаматтар мектепке жайғасқан Арыстықтарға азық-түлік, киім-кешектерін əкеліп, барынша көмек көрсетуде.

Қазіргі таңда мұнда төсек орындарынан жетіспеушілік жоқ. Жағдай тұрақты.

Арыс қалалық стансасының жетекші инженері Базаркүл Тасмұратова кешегі апаттан отбасымен бірге келіп, Шымкент қаласындағы нақ осы №55 мектеп жанындағы пунктке жайғасқан. Ол қиын жағдайда жұмылған жұдырықтай қолдау көрсеткен азаматтарға шынайы аналық алғысын білдірді. Шымкент қалалық ТЖД мəліметінше, қаладағы эвакуациялық көшіру пунктеріне азаматтарды орналастыру, тіркеу жұмыстары əлі де жалғасуда.

«Айғақ-Ақпарат»