Шымкентте Арыс тұрғындарына көмек көрсету шаралары үздіксіз жүргізіліп жатыр

Түркістан облысының Арыс қаласында төтенше жағдай жариялана салысымен Шымкентте ауқымды «Көмек қолы» іс-шарасы жарияланды. Тез арада құрылған арнайы штаб тәулік бойғы тәртіпте жұмыс істеуде. Оның құрамына шымкент қаласы әкімдігінің, полиция және төтенше жағдай департаменттерінің, «ҚТЖ» АҚ өкілдері, құтқарушылар кірген.

Тұрғындарға арнайы автобустар бөлінді

Арыс тұрғындарын Шымкентке жеткізу үшін қала әкімдігі тарапынан 100 автобус бөлінді. Бұған қоса Арыс бағытына кетіп бара жатып, Шымкентте тоқтатылған 6 пойыздың жолаушыларын Түркістан қаласына жеткізу үшін 43 автобус бағытталды. 24 маусым күні осы автобустармен Түркістан қаласына 2500-ден астам адам аттанды. Арыс қаласындағы құтқару операцияларына қатысу үшін 6506 әскери бөлімінен 541 сарбаз жіберілді.

24 маусым күні Шымкенттегі мектеп және колледжерде 15 эвакуациялық пункт ашылып, Арыс тұрғындары толықтай орналастырылуда. Азаматтар ыстық тамақ және ауыз сумен қамтамасыз етілуде. Азық-түлік, киім-кешек, аяқ киім, көрпе-төсек, балаларға қажет заттар секілді керек-жарақты Шымкенттің көптеген тұрғындары да жеткізуде. Азық-түлік эвакуация пунктеріне автокөліктермен жеткізілуде.

 10 арнайы жедел жәрдем бригадасы бөлінді

Шымкент қалалық денсаулық сақтау басқармасы тарапынан 10 арнайы жедел жәрдем бригадасы құрылды. Стационар мекемелерде зардап шегушілерге арналған қосымша 260 орын құрылды. 25 маусым күнгі мәлімет бойынша Шымкент қаласындағы ауруханаларға 96 адам келген, арасында балалар да бар. Дәрігер көмегіне жүгінгендердің арасынан 22 адам ауруханаға жатқызылып, екі адамға операция жасалды.

 Шұғыл желі іске қосылған

Бұған қоса қазіргі таңда Шымкент қалалық төтенше жағдай департаментінде 8 (7252) 44-94-72 шұғыл желісі жұмыс істеп тұр. Эвакуациялық пунктердің жетекшілерінің телефондары арқылы да осы пунктердегі азаматтар туралы барлық мәліметті білуге болады. 25 маусым күнгі сағат 12:40-тағы мәлімет бойынша шұғыл желіге барлығы 47 365 қоңырау түскен.

Шымкент қаласы әкімдігінің ресми сайтында «Арыс-Шымкент» арнайы бөлімі ашылып, сағат сайын қауіпсіз жерге көшірілген адамдар туралы мәліметтермен толықтырылуда, бұған қоса эвакуация пунктерінің мекенжайы, ондағы өкілдердің байланыс телефондары мен жоғалған Арыс тұрғындары туралы мәлімет жарияланған.

Эвакуациялық пунктер көбейді

Арыстан келіп жатқан тұрғындар санының көбеюіне байланысты Шымкенттегі эвакуациялық пунктердің саны 31-ге дейін көбейтілді. 25 маусым күнгі сағат 12:40-тағы мәлімет бойынша Шымкенттегі эвакуациялық пунктерге 2366 адам қабылданған. Бұған қоса тұрғындар мешіттер мен жатақханаларға орналастырылған, қала тұрғындары да арыстықтарды өз үйлеріне қонуға алып кетуде.

Шымкент қаласы әкімдігінің Ішкі саясат басқармасы