Келес ауданында еліміздегі ең ірі жылыжай кешені салынады

Келес ауданының аумағында арнайы қарастырылып бөлінген 500 га жерге салынатын жылыжай кешені ресейлік ірі инвестор  «Эко-культура» компаниясы тарапынан жүзеге асырылмақ. Жалпы құны 1,1 млрд долларды құрайтын 500 га аумаққа заманауи үлгідегі жылыжай кешенін салу ауданның экономикасын  көтеруге және 10 мың жұмыс орны ашылатын ауқымды жоба болмақ.

Түркістан облысының әкімдігі мен «Эко-культура» Ресейлік компаниясы арасындағы келісім бойынша жоба 2019-2025 жылдары іске асады. Еліміздегі ең ірі жылыжай кешеніне айналатын қожалықтың өнімдері алдағы уақытта ТМД мен Еуропа елдеріне экспортталатын болады. Жылыжай кешенінде негізінен қызанақ, қияр өнімдері өндірілмек.

Осы орайда бүгін жобаға инвестор компания өкілдері мен облыс əкімі Өмірзақ Шөкеев еліміздегі ең үлкен жылыжай кешені салынатын аумақпен арнайы келіп танысты.

Бұл тұрғыда Түркістан облыстық ауыл шаруашылығы басқармасының басшысы Нұрбек Бадырақовтың айтуынша ірі жылыжайға арналған жер телімінің Келес ауданынан таңдалуы да ерекше мəнге ие. Себебі бұл аумақ жылыжай ісіне қажетті инженерлік инфрақұрылымдарды тартуға қолайлы болса ең бастысы күннің түсуі жөнінен де өзіндік артықшылыққа ие.

Сондықтан  Ресейлік инвестор «Эко-культура» компаниясының өкілдері жер аумағымен танысу барысында ауданның географиялық тиімді орналасқанын атап өтіп,  кешеннің инфрақұрылым жүйесін жасау жұмыстарын  бастауға уағдаласты.

Естеріңізге сала кетейік, Келес ауданында жалпы құны 1,1 млрд долларға 500 гектарды құрайтын аумаққа жылыжай кешені салынуы бойынша ҚР Премьер-Министрі А.Маминнің Түркістан қаласына сапары аясында меморандум түзілген болатын.

«Айғақ-ақпарат»