Бүгін XVI Еуразиялық Медиа форум салтанатты түрде ашылды. Ең ірі халықаралық медиақұрылымдар өкілдері мен әлемдік деңгейдегі сарапшылардың ашық диалогын құруға басым бағыт берген форум құрылғаннан бері саяси ғылымдар докторы Дариға Назарбаева оның идеялық рухтандырушысы және Ұйымдастыру комитетінің тұрақты төрайымы болып келеді.
Бірнеше жылдан бері конференцияның тұрақты жүргізушісі болып келе жатқан, бұл күндері “Әл-Жазира Интернэшнл” (АҚШ) телеарнасының жүргізушісі және продюсері Риз Хан алғашқы пікірталас сессиясында халықаралық және өңірлік сараптаушылар, саясаткерлер мен журналистер форумның әрбір отырысында таңдалынып алынған тақырыптарды тарқатып айтатындығын тілге тиек етті.
Ең әуелі, ҚР Ақпарат және коммуникациялар министрі Дәурен Абаев ҚР Президенті Қасым-Жомарт Тоқаевтың құттықтау хатын оқып берді. Ал Алматы қаласының әкімі Бауыржан Байбек Алатау баурайында орналасқан Алматыға келген қонақтарға өз алғысын білдірді. Мұнан соң, елімізге арнайы келген қонақтар да өз пікірлерін айтқан болатын.
Форум құрылғаннан бері Қазақстанға 6000-нан астам шетелдік өкіл келген.
Биыл өткізіліп отырған XVI Еуразиялық Медиа Форумына «Бүгінгі әлем: шындық трансформациясы ма?» тақырыбы арқау болып отыр. Конференцияда әлемдік және өңірлік деңгейдегі бірқатар өзекті мәселелер көтерілмек. Күн тәртібінде: жаһандануға қарсы процестер, тұтыну дағдарысының тереңдеуі, xалықаралық құқық және жасанды ақыл-ойды пайдаланумен байланысты сын-қатерлер талқаланады.
Орталық Азиядағы көшбасшы әрі тәуелсіз диалог алаңы ретінде Еуразиялық Медиа Форумының басты мақсаты-саясаткерлер, журналистер мен сарапшылардың Қазақстан, Еуразия және дүниежүзілік қауымдастықтың геосаяси, экономикалық, әлеуметтік-мәдени дамуымен байланысты өткір мәселелерді талқылауға жағдай жасау.
