Қазақстан бойынша сот жүйесінде еңбек өтілі ең көп судья Ақжан Ештайдың өмірден өткеніне екі жыл. 30 жыл сот саласында жүріп бүйрегі шындық пен әділдікке бұрған азамат Төлеби ауданының тумасы. Киелі мекеннен нәр алған тау баласы талай-талай белесті бағындырды. Шығар шыңы әлі де биік болатын. Бірақ, тағдырына Тәңір 56 жасты жазыпты. Есімі мен еңбегі ел аузында қалған Ақжан Жайлауханұлын туған жерінде еске алып, спорттың сан түрінен спартакиада ұйымдастырылды.
Ақжан Ештай. Екі жылдан бері бейнесі бізден алыстағанмен, есімі ұмытылмайтын азамат. 1961 жылдың 5 ақпаны күні Төлеби ауданындағы Екпінді елді мекенінде дүниеге келген. Көп балалы отбасында өскен ол көпшіл, бауырмашыл болды. Қарағанды, Көкшетау қалаларында білім алып, еліміздің Торғай, Ақмола, Алматы аймақтарындағы сот саласында еңбек етті. Күрмеуі көп, түйіткілі мол жалғанда тер төгіп, заң саласында есімі өзгеден озық тұрды. Алматы қалалық сотының төрағасы болып еңбек етіп жатқан тұста лүпілдеп соғып жатқан жүрегі лезде тоқтап қалды. Қаралы күн 2017 жылдың 14 мамыры болатын. Ақиқаттың ақ қайнарын еске алып, туған жері Төлеби ауданында спартакиада өткізді.
Ақжан Жайлауханұлының негізгі хоббиі спорт болған. Әсіресе, футболды жақсы көріп, судьялар арасында өткен спартакиада кезінде жеңісті бермеген. Өзі қатысқан футбол, волейбол ойындарында тұғырдан түспеген тұлға. Сондықтан, жыл сайын еске алуға арналған спорттық ойындар ұйымдастырылып жүр. Осы жолы кіндік қаны тамған Төлеби ауданында тұңғыш рет өтті. Көзін көрген дос-жарын, ағайын-туыс бардың қадірін жоқ сәтте түсінетінін тағы бір сезді.
«Жүйрікте де жүйрік бар қазанаты бір бөлек, жігітте де жігіт бар азаматы бір бөлек». Дәл осы мақал елдің асыл азаматы Ақжан Жайлауханұлы секілді асыл азаматтарға айтылған. Нар тұлға өзі таңдаған заңгер мамандығына адал болумен қатар, қым-қуыт қызметтің ортасында дос жиған. Міне, соның нәтижесі болар рухына бас иген асыл достары жастар арасындағы спортық спартакиадада өз үлесін қосты.
Естеріңізде болса, өткен жылы Алматы қаласында Ақжан Ештайдың есімі жаңғырған болатын. Еліміздің жетекші оқу орындарының бірі Әл-Фараби атындағы Қазақ Ұлттық университетінде сот мәжілісі және медиация оқу залы ашылды. Аласұрып о дүниеге кетіп, мәңгілік ұйқыда жатқан Жайлауханұлы бұл жолы жас ұрпаққа насихатталды. Өмірбаяны доп тепкен әр спортшыға үлгі болып, жеңіске жігер тарту етті.
Бұл күні бауырлары мен отбасы көпшілікке ой бөлісіп, шерін тарқатты. Ақжан Ештай туралы көп естеліктер айтылғанда «жақсы аға көрсе өкшесін баспай ізін қуған, іні көрсе бетін қақпай белін буған» екен ғой деп ой түйдік. Леңгір қаласындағы Ш.Уәлиханов атындағы мектепті алтын медальмен бітірген Ақжан Ештайда бір кездері осы алаңда доп тепкен. Міне, сол сәт жиылған жұрттың есіне түсіп, амалсыз іштен тұнды. Соңында жұбайы мен төрт перзенті қалған Ақжан Жайлауханұлы Ештай ел есінде қалатын ер. «Ақиқаттың ақ қайнары» деген теңеуге лайықты болған азаматқа арналып ас беріліп, жарыс жеңімпаздары соңында жүлдемен марапатталды.
