Түркістанда «Парасатты полицей-2019» байқауы өткізілді

2019 жылы 15-мамырда Түркістан қаласы әкімдігінің мәдениет үйінде тәртіп сақшыларының қатысуымен дәстүрлі облыстық «Парасатты полицей» байқауы өтті. Түркістан облысы Полиция департаментінің ұйымдастыруымен өткен байқауға Полиция департаментіне қарасты қала/аудан полиция басқарма/бөлімдерінен барлығы 16 команда қатысты. Түркістан облысы Полиция департаментінің баспасөз қызметінің басшысы, полиция полковнигі Салтанат Қаракөзова өзінің құттықтау сөзінде: «Бұл байқаудың негізгі мақсаты, ҚР-ның Тұңғыш Президенті Н.Ә.Назарбаевтың «Болашаққа бағдар: рухани жаңғыру» бағдарламалық мақаласын іске асыру, «Жастар жылын» қолдауға байланысты, жас және білікті полицейлерді таныту, полицияның оң имиджін қалыптастыру, сонымен қатар, ең маңыздысы мемлекеттік тіліміз «қазақ тілінің» мәртебесін нығайту болып табылады» — деп атап өтті. Байқауға қатысушы командалар, көрермен алдында полицейлер жан-жақты, сегіз қырлы бір сырлы екендігін, отансүйгіш, тілді құрметтейтіндігін және өз өнерлерін, білім-біліктілігін көрсете алды. Тәртіп сақшыларының сахнаға шығып ұсынған нөмірлері Әділ-қазыларға, көрермендерге көтеріңкі көңіл-күй сыйлады. Полицейдің де ән шырқап, би билеп, әзіл айтатыны, шығармашылыққа жақындығы жиналған жұртты сүйсіндірді. «Парасатты полицей» байқауының қорытындысында, Әділ-қазылар алқасының шешімімен Бас жүлде алған – Төлеби ауданынан келген «Төлеби қырандары» командасы үздік деп танылды. Бірінші орынды – Арыстық «Арыс айбыны» қанжығасына байласа, екінші орынды – Жетісай АПБ-нің «Қыран» тобы мен Шардаралық «Шардара-Шағала» командалары өзара бөлісті. Ал үшінші орын Сарыағаштық «Сарыағаш қырандары» және Ордабасы АПБ-нің «Ордабасы қырандары» командаларына бұйырды. Бұған қоса, 6 номинация бойынша келесі командалар жеңімпаз болып танылды: — «Тілі басқа, тілегі бір» номинациясы Қазығұрт АПБ-нің «Жебе» командасына; — «Өнерлі жас полицей» номинациясы Сайрам АПБ-нің «Сайрам сақшылары» командасына; — « Көркемсөз шебері» номинациясы Созақ АПБ-нің «Созақ сақшылары» командасына; — «Ұйымшыл команда» номинациясы командасына; Отырар АПБ-нің «Біздің жігіттер» — «Үздік сахналық көрініс» номинациясы «Түлкібас полиция құрамасы» командасына;- «Көрермен көзайымы» номинациясы «Келес сақшылары» командасына бұйырды. Жүлделі орындар мен номинацияларға ие болған жалпы командаларға бағалы сыйлықтар мен диплом, алғыс хаттар табысталды. Түркістан облыстық ПД-нің «Парасатты полицей-2019» байқауынан суырылып алға шыққан, ерекше деп іріктелген «Төлеби қырандары» алда өткізілетін Республикалық байқауға жолдама алды.