Әлеуметтік қамқорлық кімдерге арналған?

ҚР Премьер-министрінің орынбасары Гүлшара Әбдіхалықова Түркістанға келді. Руxани астанаға келген бойда Қожа Аxмет Яссауи атындағы университеттің мәдениет үйінде облыс жұртшылығымен кездесті. Қатарында көп балалы аналар мен ұлағатты ұстаздар басымырақ. Гүлшара Наушақызымен бірге Астанадан бірнеше министрлер мен вице-министрлер ере келген. Олар ҚР Еңбек және әлеуметті қорғау министрі Бердібек Сапарбаев, Білім және ғылым министрі Күләш Шәмшидинова бар.

Елордадан келген жұмысшы топ Елбасының «Әлеуметтік қамсыздандыру» бағдарламасын түсіндірді. Мемлекеттің бұл бағдарламасы үш бағытта жұмыс атқарады. Ең алдымен қамқорлыққа зәру отбасылар мен ең төменгі жалақы иелері атаулы әлеуметтік көмекті алатын болады. Үшінші бағыт өңірлерді дамыту. Осы жағдайларды Қазақстан Республикасы Премьер-министрінің орынбасары жан-жақты түсіндіріп берді. Ал, ҚР Еңбек және әлеуметтік қорғау министрі Бердібек Сапарбаев қандай аналар баласына қаражат алатынды ашып айтты. 2019 жылдың сәуір айынан бастап 18 жасқа дейінгі әрбір балаға 20 789 теңге берілмек. Және 23 жасқа дейінгі студенттерге де осы қаражат төленеді. Тек отбасына кіретін қаражат адам басына шаққанда 20 789 теңгеден төмен болса ғана. Түркістан облысында 280 мың отбасы атаулы әлеуметтік көмек алады.

Білім және ғылым министрі Күләш Шәмшидинова да ұстаздарға жасалатын жағдайды жариялады. Енді педагогтар курста тегін оқып, жалақыны жоғары алады. Бұған дейін елімізде 1 мың 672 мектеп салынса, соның 521 Түркістанға тиесілі. Ал алдағы уақытта жаңа мектептердің құрылысына 12 млрд. теңге бөлінген. Сол қаражатқа 190 мектеп салынса, оның 20-сы Түркістан облысында бой көтермек. Білім министрі ең бірінші баланы қазақ тілінде оқытамыз, ағылшын тіліне асығыстық жоқ дейді. «Жақсы бала өсіру мектептің де, ата-ананың да, қоғамның да міндеті» деген Шәмшидинова баяндаманы тым басқаша жасады. Қарапайым тілмен, құлаққа қонымды етті. Жиынға қатысқандар ұйып тыңдады. Мұнан кейін денсаулық сақтау саласы мен тұрғын-үй құрылысы бағыты бойынша тақырып қозғалды. Алтын құрсақты аналары көп Түркістанда алдағы уақытта баспана мәселесі өзінің оңды шешімін таппақ. Яғни, мамыр айынан бастап кезекте тұрғандар үймен қамтыла бастайтын болады.