Мемлекет басшысы мегаполиске табан тіреді

Алғашқы сапарын Түркістаннан бастаған Мемлекет басшысы түс ауа Шымкент қаласына табан тіреді. Мегаполиске келген Қасым-Жомарт Тоқаев ең алдымен «Шымкент сити» қалашығының жұмысымен танысып, құрылыс нысандарын аралады. Ағымдағы жылы Шым шаһарда жаңадан көпқабатты тұрғын үйлер мен мәдениет және өнер нысандары бой көтермек. Сондай-ақ, білім беру саласы бойынша 5 мектеп 9 балабақшаның да құрылыстары жүргізілуде.

Мұнан соң Мемлекет басшысы заманауи үлгіде салынып жатқан әуежайдың жұмыстарымен танысты. Жалпы алаңы 28 мың м² құрайтын 3 қабатты ғимарат. Әуежайдың құрылысын елімізге белгілі «Scat» әуе компаниясы жүргізіп жатыр. Ал, абаттандыру жұмысын қалалық әкімшілік өз міндетіне алған. Жобаның жалпы құны 18,7 млрд. теңгені құрайды. Президентке таныстырылған келесі жоба — Ескі қалашық (Цитадель). Айта кетейік, мегаполистегі бұл қалашықта 2020 жылға қарай аспан астындағы музей салыну жоспарланған болатын.

Қасым-Жомарт Тоқаев ат басын қалашықтағы Қошқара ата аймағына бұрды. Жобасы 2018 жылы басталған Қошқар атаның жалпы ауданы 54,6 гектар. Бұл Шымкент қаласының ең көрікті демалыс орындарының бірі. Тұран шағын ауданының инженерлік инфрақұрылымдық құрылысы да ел Президентіне таныстырылды. Қазіргі таңда бұл шағын ауданда 43 тұрғын үйдің құрылысы қарқынды жүріп жатыр. Ал пәтерлердің жалпы саны 1556. Коммуналдық жұмысқа бөлінетін қаржының жалпы суммасы 10 220,0.

«Айғақ-ақпарат».