Бүгін алтыншы шақырылымдағы Шымкент қалалық мəслихатының кезектен тыс қырық алтыншы сессиясы өтті. Кезектен тыс ұйымдастырылған жиынға қала әкімі және әкімдік мүшелері, жерігілкті атқарушы орган басшылары мен БАҚ өкілдері қатысты.
Күн тəртібінде бір ғана маңызды мəселе қаралды. Бұл бойынша Шымкент қаласының əкімі Ғабидолла Əбдірахымов баяндама жасады. 
Күні кеше ғана мерзімінен бұрын өз өкілеттігін тоқтатқан Тəуелсіз Қазақстан Республикасының Тұңғыш Президенті Н.Ə. Назарбаевтың Шымкент қаласы үшін де сіңірген еңбегі мол екендігіне тоқталған қала əкімі депутаттар алдына маңызды ұсыныс тастады. Бұл Шымкент қаласындағы əкімшілік іскерлік аймағы маңындағы Астана даңғылын Нұрсұлтан Назарбаевтың есімімен атау болатын. Игі бастаманы қалалық мəслихат депутаттары бір ауыздан қолдап дауыс берді. 
Астана даңғылы — Шымкент қаласының бас көшесі. Онда қаланың әкімшілік-іскерлік орталығы орналасқан. Енді Шымкент қаласындағы Астана даңғылы Нұрсұлтан Назарбаев даңғылы деп аталатын болады!
