Қазақстандық Дмитрий Баландин Словенияда жүзу турнирінде төртінші «алтын» иемденді, деп хабарлады ҚР Ұлттық олимпиада комитетінің (ҰОК) баспасөз қызметінен.
«Словенияда жүзуден әлем чемпионаты мен Олимпиада ойындарына іріктеу сайысы саналатын халықаралық турнирдің екінші жарыс күні аяқталды. Қазақстандық Дмитрий Баландин бұл сындағы төртінші алтынына қол жеткізді. 2016 жылғы Олимпиада ойындарының чемпионы Баландин 100 метрге брасс әдісімен жарысудан топ жарды», — делінген дүйсенбідегі хабарда.
Сондай-ақ, Диана Назарова 50 метрге, Анастасия Резванцева 200 метрге шалқалап жүзуден турнирдің алтынына қол созды. Әділбек Мусин 50 метрге баттерфляй әдісімен, Аделина Пчелинцева 100 метрге брасс әдісімен жүзуден екінші орын иеленгенін айта кеткен жөн.
«Ерлер арасындағы кешенді эстафетада Әділ Қасқабай, Әділбек Мусин, Дмитрий Баландин мен Александр Варакин төрттігі чемпион атанса, қыздар командасы дәл осы бағдарламада күмістен алқа тақты», — делінген хабарда.
Хабарда атап өтілгендей, Баландин осыған дейін төрт алтын медаль иемденді: брасс әдісінде 50, 100 және 200 м, сондай-ақ 100 м. кешенді эстафетада.
