Батырбек Өтеп мектебінің оқушылары жарады!

Батырбек Өтеп атындағы өнер мектеп-интернатының оқушылары жарады! Түркістан облыстық Білім басқармасының қарамағына қарасты мекеменің атағы тағы да асқақтап тұр. Мұндағы шәкірттер республика, облыс деңгейінде өткен бір емес-ау бірнеше іс-шарадан жүлдемен оралған. Суретшілер мен ақындарды оқытатын білім ошағының жетістігіне қуанған ұстаздарды көрсеңіз ғой.Ғимарат Шымкент қаласының жерінде орналасқан ал, өзі Түркістан облысына қарасты. Өнер мектебінде 280 оқушы білім алып жатыр. Дарынды балаларға арналған мекеме Қазақстандағы қолданбалы өнерді, соның ішінде тоқыма саласын енгізген кәсіпқой суретші Батырбек Өтептің есімін иеленген. Мұнда оқуға түскендер көркем сурет және музыкалық бағытта білім алады. Жәй білім алып қоймай, міндетті түрде фестивальдерге қатысып жеңуі тиіс. Осы ұстанымды ұстанғандар тағы бір белесті бағындырып отыр. Алматы және Түркістан қалаларында өткен байқаулардан топ жарған. Мәселен, рухани астанада «Ұлы Даланың жеті қыры» атты фестиваль өтті. Оған 800 бала қатысса, соның 49 Батырбек Өтеп мектебінің шәкірттері. 50 пайызы жеңіске жетіп, өнер ошағының мәртебесі биіктеді. Өнердің қыр-сырын үйрететін мектептің оқушылары Алматы қаласындағы сайыстан да жеңіске жеткен. Өскен өлкенің намысын қорғап, талантымен топты жарып шыққандарды мектептің ұстаздары мен ата-аналар қаумалады. Сахнаға шығарып арнайы марапаттап, мадақтады. Бұл оқушылардың талантын шыңдауға, шабытын дамытуға мүмкіндік.Байқауға қатысып қайтқан барлық оқушының еншісінде жүлде бар. Сол бәйгеге дайындаған әрине ұстаздардың еңбегі. Мереке қарсаңындағы қуанышқа ұлағатты жандар шексіз қуанып, алғыс арқалап қайтты. Дарынды балалардың жолын ашқан білім ұясы әсіресе ауыл балаларының өнерін шыңдауға арналған. Таланты бар, танысы жоқтарды жарыққа шығаратын мектепті ақын Маржан Есжанова басқарып отыр. Ол «Шымкент — адалдық алаңы» жобасы аясында директорлық кабинетін сыныпқа берген басшының бірі.Алғашында көркемсурет бағыты бойынша құрылған мектеп 2006 жылы жаңа ғимаратқа ие болды. Қазір таланттарды шыңдап жүр. Бүгінге дейін талай шәкірттің қанатын қатайтып, жол сілтеген мектеп «болар ұлдың бетін қақпайды, белін буады». Өнерге құштар оқушылардың жетістікке жетуі соның бір айғағы.

«Айғақ-ақпарат».