— Түркістан облысы әкімі Жансейіт Түймебаевтың өкімімен, Ордабасы аудандық мәслихат депутаттарының келісімімен Ордабасы ауданының әкімі қызметіне Қайрат Жолдыбайұлы тағайындалды. Ол 1981 жылы Шардара қаласында дүниеге келген. 2003 жылы С.Сейфулин атындағы Қазақ аграрлық университетін экономист-менеджер мамандығы бойынша бітірген. Мемлекеттік және жергілікті басқару магистрі. ҚР Президенті жанындағы Мемлекеттік басқару академиясындағы оқу кезінде АҚШ-тағы Джорджия университетінде «Universiti of Georgia» оқыған. Еңбек жолын 2003 жылы Білім және ғылым министрлігінің бюджеттік жоспарлау департаментінде жетекші маман болып бастаған. 2005- 2008 жылдары Қаржы министрлігінің бас маманы, бөлім басшысы лауазымдарын атқарған. 2008 жылдан бастап ҚР Парламенті Сенатында қызмет жасаса, одан кейінгі еңбек жолын Шардара ауданы әкімінің орынбасары қызметімен жалғастырған. Ендігі жерде Қайрат Жолдыбайұлы Ордабасы ауданының тізгінін ұстады.
— Түркістан облысының әкімі Жансейіт Түймебаев Қазақстан мұсылмандары діни басқармасы Түркістан облысы бойынша өкіл имамы және облыстағы аудан, қалалық бас имамдарды қабылдады. Кездесу барысында Қазақстан мұсылмандары діни басқармасы Түркістан облысы бойынша өкіл имамы Мұсабек Ақтамберді, «Дін мәселелерін зерттеу орталығы» КММ-сі директорының міндетін уақытша атқарушы Мәди Әбзелбекұлы Бесбаев, Жетісай ауданының бас имамы Бекзат Оқапұлы Сыздықов және Төлеби ауданының бас имамы Самат Сапарханұлы Анарбаев ұсыныс пікірлерін білдірді. Жалпы облысымыздағы діни ахуал тұрақты екендігін жеткізген дін саласының қызметкерлері атқарылған жұмыстарға тоқталып, алда жасалатын діни іс-шаралар жоспарымен де таныстырып өтті. Өзге ағымдарға қарсы ағарту және алдын-алуда жүйелі істің жүргізіліп жатқандығы айтылып, бірнеше бағытқа бөлінген жұмыстардың жай-күйі баяндалды. «Халықпен мейлінше тиімді жұмыс жасау үшін, Елбасы барлық жағдайды жасап отыр. Балаларымыз, жастарымыз үшін күнделікті жұмыс істеуіміз керек. Ас беру кезінде ысырапшылдыққа жол бермеуді айтып келеміз. Қазақ халқына тән салт дәстүрлер мен әдет-ғұрыпты насихаттап, соған мән беру маңызды»-деді облыс әкімі. Өз кезегінде қоғамдағы жастардың тәрбиесіне айрықша көңіл бөлу керектігін баса айтқан Жансейіт Қансейітұлы бірнеше мәселе бойынша тапсырмалар берді. Діни тұрақтылықты сақтау мақсатында аудан қалаларда дәстүрлі діни бағыттағы үгіт-насихат жұмыстарын жалғастыруды тапсырды.
— «Нұр Отан» партиясы Түркістан облыстық филиалының кезектен тыс 36 конференциясы өтті. Түркістан облысының əкімі, «Нұр Отан» партиясы облыстық филиалының төрағасы Жансейіт Түймебаев пен мəслихат депутаттары жəне бастауыш партия ұйымдарының мүшелері қатысқан конференция күн тəртібінде жеті мəселе қаралды. Сонымен бұл күні көшбасшы партияның саяси кеңесінің жаңа құрамы бір ауыздан сайланса, «Нұр Отан» партиясының Астана қаласында өтетін 18 сьезіне өңірімізден ұсынылған делегаттар тізімі де бір ауыздан қолдау тапты.
— Шымкентте «Нұр Отан» партиясы филиалының кезектен тыс 36-шы конференциясы өтті. Қала әкімінің орынбасары, партияның бюро мүшесі Қайрат Нұртай қатысқан алқалы жиынға, саяси кеңес мүшелері мен бастауыш партия ұйымдарының төрағалары келді. Жиынның күн тәртібінде 7 бірдей мәселе қаралып, қатысушылардың назарына алынды. Сонымен қатар, бұл күні Астана қаласында өткізілетін «Нұр Отанның» 18-ші сьезіне 60 бірдей делегат Шымкенттен сайланды.
— Түркістан облыстық клиникалық аурухананың көз аурулар бөлімшесіне Украиналық дәрігер Оксана Петренко жергілікті дәрігерлермен тәжірибе алмасу үшін арнайы келген. Көзін жарақаттаған науқастарға шетелдік маманның қатысуымен ота жасалды. Ақпанның 13-і мен 14-і күндері жергілікті медицина қызметкерлеріне мастер класс өткізетін болады.
— 15 ақпан – Кеңес әскерлерінің Ауған жерінен шығарылғанына 30 жыл. Осы айтулы күнге байланысты Отырар кітапханасында ардагерлер мен оқушылар басқосты. «Ауған соғысы: отқа оранған он жыл» тақырыбында өткен жиында сұрапыл соғыстағы естеліктер айтылып, қаза болған батырларға құрмет көрсетілді.
«Айғақ-ақпарат».
