— Түркістанда су тоғандарына бақылау күшейтілді. Мұндай тапсырма бүгін Түркістанда аймақ басшысы Жансейіт Түймебаевтың төрағалығымен өткен облыс әкімдігінің кеңейтілген мәжілісінде берілді. Күн тәртібіндегі негізгі мәселелердің бірі — «Гидротехникалық нысандарды тасқын судан сақтау, жинақтау және бөлу туралы» сөз алған ауылшаруашылығы басқармасының басшысы Нұрбек Бадырақов қар суы мен тасқын суларды жинау үшін су қоймаларын салу және реконструкциялау бойынша 26 шағын су қоймасының құрылысын жүргізу арқылы ауылшаруашылығы айналымына жаңа 25,5 мың гектар жер енгізуге мүмкіндік беретінін жеткізді. Тақырыпқа қатысты әрбір ауданда атқарылып жатқан жұмыстарға жекелей тоқталған Нұрбек Бадырақов ағымдағы жылы құны 1,2 млрд. теңгеге 10 нысанды қалпына келтіру жоспарланып отырғанын жеткізді. Нәтижесінде, Түркістан облысында 400 гектар жер жаңадан іске қосылып, 6 мың гектар жер сумен қамтамасыз етіледі, 1,2 мың гектар аймақтың мелиоративтік жағдайы жақсармақ.
— Шымкент қаласы әкімдігінің 3 бірдей басқармасының атауы өзгертілді. Бұл шешім Шымкент қалалық мәслихаттың кезектен тыс өткен 44-ші сессиясында тхалық қалаулыларымен мақұлданып, толықтырулар енгізілді.
— Биыл Өзбекстандағы Қазақстан жылы. Осыған орай ұйымдастырылып жатқан игі істердің легі көңіл қуантады. Соның бірі Ташкенттің төріндегі Түркістан сарайында өтті. Екі елдің әдеби достығын қаламына арқау еткен Мекембай Омаров 70 жылдық мерей тойына орай әдеби кеш ұйымдастырылды.
— Ер есімі ел есінде. Бүгін Орта Азия халықтары арасынан шыққан тұңғыш Генерал-майор Сабыр Рахымовтың туған күніне биыл 117 жыл толуына орай іс-шара ұйымдастырылды. Салтанатты шараға ұлы батырдан тараған ұрпақтары, майдангерлер, ұлы тұлғаның атымен аталатын мектептердің өкілдері мен оқушылар қатысты. Онда батырдың өмірбаянынан сыр шертетін бейнероликтер ұсынылып, соғыс алаңында жасаған ерліктері тағы бір мәрте ұлықталды. Көзделген мақсаты, ұлы тұлғаның ерлігін жастардың санасына сіңіріп, жас буынның арасында патриоттық тәрбиені насихаттау.
— Түркістан облысының халқы тағы бір үшеммен толықты. Бұл сүйінші хабарды Түркістан облыстық №1 перенаталды орталықтың дәрігерлері жеткізді. Жүктіліктің 32 аптасында ерте босанған Жадыра Абдалиева үшемді ота арқылы өмірге әкелген. Алғашында жансақтау бөліміне жатқызылған сәбилердің қазірде жағдайы бірқалыпты болып, өз отбасына қайтарылды.
— Ал Шымкентте 10 ақпан күні «Shymkent Plaza» ойын – сауық орталығында Айша есімді қыз дүниеге келді. Анасы, Әйгерім Әбікәрімқызы айы күні жеткенде, перенеталды орталыққа дайындалып , өзіне қажетті заттарды алуға, белгілі сауда орталығына келеді. Алайда, 23 жасар қыздың аяқ асты толғағы ұстап, тап осы Шымкент плаза орталығында босанады. Жедел көмек көрсетуге, сауда орталығының ұжымы бірден кіресе кетіп, жас ананың өмірге аман –есен сәби алып келуіне көмек көрсетті. Сонымен қатар, бұл қуанышты жағдайға, орталық акімшілігі демеушілік жасап, сәбидің 1 жылдық жөргегі мен баланы тасымалдау арбасын сыйға тартты.
— Ордабасы тауында үш жүздің басы қосылғандығы тарих беттерінен белгілі. Қайсар қазақтың бірлігі мен амандығы сөз болған киелі орында Қазбек би, Әйтеке би және Төле бидің ескерткіштері 2018 жылы орнатылған. Ал 1993 жылы түркі тілдес үш мемлекеттің Президенттері дәл осы мекенде бабаларды еске алу жиынына қатысқандығы тағы бар. Бірнеше рет тарихи жайтқа куә болған Ордабасы тауында туризмді дамытуда қандай жұмыстар атқарылып жатыр?
— «Openlab» — халықаралық білім беру шарасы Шымкентке де жетті. Құрылғанына 3 жыл толған білім жәрмеңкесі осыған дейін тек Алматы қаласында өткен. Бүгінде еліміздің Алматы, Шымкент, Павлодар мен Петропавл қалаларында жалғасын тауып отыр. Егерде сіз – физика, химия, биология және басқа да жаратылыстану бағыттары туралы өз біліміңізді тексергіңіз келсе, ашық зертханаға келуді ұмытпаңыз! «Ашық лаборотория» жастар арасында «Laba» зертханалық жұмыстарымен танымал. Іс-шараға онлайн тіркелуге мүмкіндік бар және онлайн режимде сынақ тапсыра аласыз. Жастар ресурстық орталығында өткен «Ашық лабораторияның» мақсаты – жастар арасында ғылыми сауаттылықты арттырып қана қоймай, қызығушылықтарын да ояту. Биылғы «Laba» білім жәрмеңкесі химиялық элементтердің мерзімді кестесіне қатысты сұрақтар мен жұмбақтарды қамтиды. Іс-шараға қатысушылар 25 тест сұрақтарына жауап берді. 28 мемлекетті қамтитын «Openlab» жобасы әлем жастарының ғылымға бет бұруына түрткі болмақ.
— Шымкент қаласында өткен Халықаралық волейбол жарысы қорытындыланды. Айта кетейік, белгілі волейболшы Пердебай Мырзашүкіровтың атынан ұйымдастырылған сайысқа көршілес Ресей, Қырғыстан, Өзбекстан мен елімізідің үздік спортшылары шақыртылған. Жастар арасында өткен сайыс 1 күн бойы жалғасып, тартысты өткен болатын. Спортты дамыту, жас спортшылардың волейболға деген қызығушылығын арттыру мақсатында ұйымдастырылған турнирдің бас жүлдесіне 300 мың теңге қойылған. Одан бөлек, екінші орынды иеленген команда 200 мың теңгені және үшінші орын иегерлері 100 мың теңгені қанжығасына байлайды. Енді, осы сыйақылар қай командаларға бұйырғанына тоқталсақ. 12 команданың ішінен топ жарып, алға шыққан «Шымкент-жанармай» командасы болды. Ұпай санымен артта қалған Қызылорда қаласының «Қайсар» командасы екінші орынды қанағат тұтты. Ал, Түркістан облысының намысын қорғаған «Көлік инспекциясы» командасы үшінші орын алды. Сондай-ақ, «Үздік волейболшы» номинациясын Батырсейіт Қайырлыбаев иемденді.
«Айғақ-ақпарат».
