Мемлекет басшысы Нұрсұлтан Назарбаев 2018 жылдың 7 қарашасында тарифті қалыптастыру мәселесіне байланысты Қауіпсіздік кеңесінің отырысын өткізген болатын. Онда коммуналдық қызмет ақысына қатысты бірқатар нақтылы тапсырмалар берген. Осыған орай, 2019 жылдың 1 қаңтарынан бастап барлық коммуналдық қызметтердің тарифтері төмендеді.
Шымкент қаласында сумен жабдықтау 97 теңге 97 тиыннан 88теңге 17 тиынға төмендеді. Яғни, 9 теңге 8 тиынға арзандады. Ал, жылумен жабдықтаудың тарифі 110 теңге 78 тиын болып бекітілді. Айырмашылық 31 теңге 53 тиын. Мегаполисте осы күнге дейін 60 шаршы метрлі екі бөлмелі пәтер иесі коммуналдық қызметке 14 200 теңге төлеп келген болса, 2019 жылдан бастап 11 800 теңге, яғни 2367 теңге аз төлейтін болады. Түркістан облысының тұрғындары сумен жабдықтауға 2018 жылы әр текше метрге 62 теңге 69 тиын төлеген болса, 2019 жылдан бастап 58 теңге 35 тиын төлейді. 6,93 % төмендеген, яғни 11 теңге 49 тиынға арзандаған.
Дархан Қайыңбердиев Шымкент қаласы табиғи монополиялады реттеу, бәсекелестікті және тұтынушылар құқығын қорғау комитет департамент басшысы
Түркістан облысында электр жарығы 6,8 %-ға арзандады. Тұрғындар осы уақытқа дейін электр жарығының әр кило ватына 15,72 теңге төлеп келген болса, 1 қаңтардан бастап 14,65 теңге төлейтін болады. Ал көгілдір отынның әр текше метрі үшін 34 теңге 47 тиын төлеп келген өңір халқы енді 32 теңге 47 тиын төлемек. Яғни, төлем құны 5,8 % арзандап отыр. Облыстағы жылумен жабдықтауға пәтер иелері есеп құралымен 5192 теңге төлеген болса, енді 4397 теңге төлейді. Есеп құралынсыз 6558 теңге төлеп келсе, осы айдан бастап 5 554 теңге төлемек. 15,31 % арзан. Облыстағы 47 шаршы метрлі екі бөлмелі пәтер иесі 2019 жылға дейін жылуға 4316 теңге төлеген болса, 2019 жылдан бастап 3655 теңге төлейтін болады. Ал, есеп құралынсыз 6059 теңге төлеп келген облыс тұрғыны, осы жылдан бастап 4091 теңге төлейді. Демек, шамамен 2000 теңгеге жуық ақша үнемделеді.
Ерболат Ибрайханов Түркістан облысы табиғи монополиялады реттеу, бәсекелестікті және тұтынушылар құқығын қорғау комитет департамент басшысы
Елбасы коммуналдық қызмет тарифі жөнінде 2018 жылы 5 қазандағы халыққа арнаған жолдауында «Бұл – маңызды мәселе, ол бизнес үшін кететін шығынның артуына, адамдардың нақты табысын азайтуға әкеп соқтырады» деген болатын. Халықтың әлеуетінің көтерілуіне аз да болса септігін тигізген игі бастамаға ел қуануда. Түбіртегін арқалағандар, ондағы санның қаншалықты азайғанын осы айда-ақ көретін болады.
Айтолқын Молдабекова.
