— Үшінші мегаполис тарихында алғаш рет мектеп мұғалімі Қазақстанның «Еңбек ері» атанды. Тәуелсіздік мерекесі қарсаңында Шымкенттік мұғалімді Нұрсұлтан Назарбаев марапаттады. Айтулы марапатпен шым шаһарға оралған ұлағатты ұстазды қала әкімі Ғабидолла Әбдірахымов күтіп алып, қошемет көрсетті.
— «Елбасы жолы. Астана» көркем фильмін Түркістан облысының әкімі Жансейіт Түймебаев Сарыағаш қаласының тұрғындарымен тамашалады. Бұл картина – «Елбасы жолы» киноэпопеясының бір бөлігі. 1994 жылғы шілде айында ел астанасын Алматыдан Ақмолаға көшіру туралы маңызды шешім қабылданған болатын. Дәл осы жылдарда орын алған тарихи жайттар толық қамтылған кинокартина көрермендердің жүрегіне жол тартты.
— Түлкібас ауданында «Цифрлық Қазақстан» бағдарламасы аясында тиімді жобалар іске асырылып жатыр. Аймақта Елбасы тапсырмасына сәйкес мемлекеттік қызметтің сапасын арттыру бағытында бірқатар мекемелер жұмысын бастаған. Солардың бірі — Түлкібас аудандық соты жанынан ашылған халықтық кеңсе.
— Абай ауданының Жаңаталап аумағына қарасты Көкбұлақ тұрғын алабында Бадам өзенінің жағалауын бетондау жұмыстарының екінші кезеңі аяқталды. Яғни, үш мыңнан астам тұрғыны бар Көкбұлақ алабының іргесі арқылы өтетін өзен арнасының кеңеюі бұған дейін жергілікті тұрғындардың басты мәселесіне айналып келген болатын. Міне, осыған байланысты төтенше жағдайдың алдын алу мақсатында өткен жылы тиісті қаржы қаралып өзен арнасының 1,5 шақырымға жуығы бетондалса, биыл тағы 1 шақырымы қапталып шыққан. Нәтижесінде өзен суынан енді ауылға төнер қауіп жоқ. Ал, мұндай іске жергілікті тұрғындардың айтар алғыстары шексіз.
— Дәрігер мен пациент арасында туындаған кикілжіңді зерттеу және оны заң тұрғысынан шешу. Ұжыммен жұмыс кезінде орын алған қолайсыздықтарды реттеп, оның алдын алу. Осы сипаттағы күрмеулі мәселені шешуде медицина мамандары қандай әрекетке бару керек? Осы орайда, «Сенім» Республикалық қоғамдық бірлестігінің Түркістан облыстық филиалы мамандары денсаулық сақтау жүйесі қызметкерлерінің басын қосып, семинар өткізді. Бұған, облыс бойынша аталмыш кәсіподақ мүшелігіне қабылданған дәрігерлер қатысып, арнайы мамандардан дәріс алды. Кәсіподақ тарапынан алғаш рет өткізіліп отырған семинар екі бөлімнен тұрады. Алғашқы бөлімде даулы мәселеде дәрігердің құқығы мен міндеті айтылса, екінші бөлімде медициналық орталықтар арасында нәтижелі келіссөз жүргізу тәртібі баяндалды.
— Бір мезетте 20 оқушымен шахмат ойнады. Шахмат бойынша әлемнің көпдүркін чемпионы Динара Сәдуақасова Қазақстан аймақтарын аралауда. Ондағы мақсат шахмат спортын халық арасында насихаттау, әйгілеу. Шымкент қаласына аялдаған үздік спортшы жастартарға шахматтың тек спорт емес, өзін-өзі дамытудың құралы екенін айтады.
