Тәуелсіздік күні қарсаңында Шымкенттегі А.Пушкин атындағы N1 мектеп-гимназияның мұғалімі Алина Соловьева «Қазақстанның Еңбек Ері» марапатына ие болды. Ұстазды Мемлекет басшысы НұрсұлтанНазарбаев марапаттады.
15 желтоқсан күні кешкісін еңбегі сіңген педагогты әуежайдан Шымкент қаласының әкімі Ғабидолла Әбдірахымов күтіп алды. Мегаполис әкімі Алина Соловьеваны марапатымен құттықтап, еңбегіне табыс тіледі.
Алина Робертовна Соловьева — Шымкентке белгілі педагог-биолог. Туған қаласында 1994 жылдан бері еңбек етіп келеді. Ұзақ жылдан бергі еңбек жолында 35 еңбек жазған. Оның ішінде 12 оқулық, биология пәнінің оқытушыларына арналған 7 методикалық жетекшілік, 5 электронды мультимедиалық қосымша мен оннан астам ғылыми еңбек бар.
Алина Соловьева дайындаған олимпиада жүлдегерлері жалпы есепте 127 жүлделі орын, оның ішінде республикалық және халықаралық олимпиадаларда жүлдегер атанды. Жерлесіміз — ҚР білім беру ісінің үздігі, ОҚО 2001 жылғы үздік мұғалімі.
