Жаңалықтар. 5 желтоқсан, 2018 жыл

— Қазақтың қас батыры Қарасайдың туылғанына биыл 42 жыл. Осыған  орай тарихшылар мен ғалымдар Мұхтар Әуезов атындағы Оңтүстік Қазақстан мемлекеттік университетінде бас қосты. «Ел батырлары-ұлттық рухы. Таным мен тағлым» атты халықаралық ғылыми конференцияда батыр баба жайында тың деректер қозғалды.

— Қожа Ахмет Ясауи атындағы Халықаралық қазақ-түрік университетінде «Мемлекеттік қызметке кадрлар даярлаудағы мәселелер» тақырыбында семинар өтті. Семинардың негізгі мақсаты мемлекетте білімді қызметкерлердің саны мен сапасын арттыру. Жиынға Әзербайжан, Ресей сондай-ақ Қазақстанның  саясаткерлері мен Гарвард және Сингапур университеттерінің түлектері қатысып, білімдері мен тәжірибелерін ұсынды

— «Ел көшін бастау – маған сын, мені қостау – елге сын» деп қазақ елін даңғыл жолға сала  білген Елбасына халықтың ықыласы қашан да ыстық. Республикамыздың түкпір-түкпірінде Тұңғыш Президент күнінің аталып өтуі соның айғағы. Отырарлықтар да бұл күнді ерекше тойлады.

– Мемлекет басшысы биылғы Жолдауында еңбек өнімділігін және қайта өңделген ауыл шаруашылығы өнімінің экспортын 2022 жылға қарай 2,5 есеге дейін көбейту қажеттігін тапсырды. Міне осы бағытта талмай еңбектеніп жатқан ұжымның бірі Отырар ауданына қарасты  Шілік ауылындағы «Нұр Шілік» ауыл шаруашылығы өндірістік кооперативі. Негізінен етті бағыттағы ірі қара мал шаруашылығымен айналысатын ұжым өткен жылдан бастап тәулігіне 500 литр сүт  өңдейтін цехты іске қосса, шаруашылық қымыз қымыран өндіру ісін де жолға қойған. Ал нақ осы  кооперативтің негізін қалаған жергілікті жердің тумасы Гүлсара Сейітжан ендігі жерде Шілік ауылынан  200 орынға шақталған заманауи үлгідегі мейрамхана ашып өз кәсібін жандандырып отыр.

— Сарыағаш ауданынан бөлініп, жаңадан құрылған Келес ауданының әкімі 10 айда атқарған жұмыстар бойынша брифинг өткізді. Аудан басшысы  Ақментай Есбаев өңірді дамытудағы атқарылған жұмыстарын қорытындылап, алдағы бағыттарын таныстырды. Ең маңыздысы ауданда инфрақұрылым саласындағы мәселелерді шешу үшін көптеген жоспарлар жасалып отыр.

  – Шымкент қаласында іргелі оқу орындарының бірі саналатын жол –көлік колледжінде алғаш рет  «Саналы Ұрпақ» фронт офисі мен «адалдық дүкені ашылды. Мұндағы мақсат білім беру жүйесіндегі сыбайлас жемқорлықты жою бағытындағы пилоттық жобаларды іске асыру болып табылады. Яғни, Мемлекеттік қызмет істері және сыбайлас жемқорлыққа қарсы іс-қимыл Агенттігінің Шымкент қаласы бойынша Департаментінің бастамасына қолдау танытқан оқу ордасы алғашқылардың бірі болып жаңа бастамаларды жүзеге асырып отыр. Міне осы бағыттағы жұмыстарды әрмен қарай алға жылжыту бойынша бұл күні салалық департамент пен қалалық білім басқармасы арасында бірлескен меморандумға қол қойылды.