Астанада Қазақ интернетінде контент жасаушылардың ІІІ форумы өтіп жатыр

Бүгін Қазақстан ұлттық арнасы және Қазақстан баспасөз клубының ұйымдастыруымен «Қазақ интернетінде контент жасаушылардың ІІІ форумы» Астана төрінде өтуде. Форум ҚР Ақпарат және коммуникациялар министрі Дәурен Абаевтың алғы сөзінен бастау алды. Ол өз сөзінде бүгінде электрондық нұсқадағы қазақ тілді аудиторияға арналған сайттар мен әлеуметтік желілер күннен күнге көбейіп келе жатқандығын, бұл өз кезегінде қазақ тілінің мәртебесін көтеретіндігін айтып өтті. Сондай-ақ, Елбасының «Болашаққа бағдар:рухани жаңғыру» және «Ұлы даланың жеті қыры» атты бағдарламалық мақалаларын насихаттауда қосып отырған қомақты үлесі үшін алғысын білдірді.

«Бүгінде қазақтілді сайттардың саны да, салмағы да артып келеді. Уақыт талабына сай өз аудиториясын қалыптастырған бәсекеге бейім порталдардың қарасы көбейіп жатыр. Осы қарқын жалғасса, мемлекеттік тіліміздің мәртебесі өседі», — деді Д.Абаев.

«Осындай ауқымды жұмысты атқарғандарыңыз үшін ақпарат және коммуникациялар министрлігі атынан сіздерге алғыс айтамыз. Әлем бір орында тұрған жоқ. Интернет түрлі бағыттар бойынша жан-жақты дамып жатыр. Сол себепті аудиторияға қызықты контент, оқырманға тартымды портал қалыптастыру — бүгінгі заман талабы. Қазір қазақтілді сайттардың өз бағыты қалыптасып келеді. Осы жайт көңілге қуаныш ұялатады. Бүгінде нақты дерегі бар қысқа да нұсқа ақпарат құнды. Осыдан он жыл бұрын біз қазақтілді сайттар болса екен деп ойлатынбыз. Қазір ондай сайттар бар. Саны да аз емес. Енді, сол сайттардың сапасын арттыруымыз қажет», — деп атап көрсетті Д. Абаев.

Айта кетейік, форум төрт бөлімнен тұрады. Басқосу контент басқарудың заманауи технологиялары, «Ақылды журналистика: шынайылықтың медиалануы, хайп-мәдениет феномені және келешек трендтерге шолу» тақырыптарында өрбімек.

Ұлжан Наушабаева