ОҚМУ-да «Мұхтартану» орталығы ашылды

Мұхтар Омарханұлы Әуезов – ХХ ғасырда қазақ әдебиеті мен мәдениетіне өлшеусіз үлес қосқан ұлы тұлға, кемеңгер жазушы, данышпан ойшыл. Ұлы жазушының өмірі мен шығармашылығын, даналық тағылымын оқып үйренудің маңызы зор. Әйгілі шығармалары дүниежүзілік әдебиеттің алтын қорына қосылған жазушының шығармашылық өнері бағдарламалық талаптарға сай орта, арнаулы және жоғары оқу орындарында жан-жақты оқытылып келе жатқаны құптарлық құбылыс. М.Әуезов сынды көп қырлы талант иесінің әдеби мұралары мен мәдени өмірімізден алатын орнын жоғары білім беретін институттар мен университеттерде терең оқытудың мәні мен маңызы айырықша.

Ұлы жазушының есімін иеленген университетте енді «Мұхтартану» орталығы бар. 75 жылдық мерекеге орай, арнайы ашылды. М.Әуезовтің ұлы Мұраттың рухани қолдауының арқасында, орталыққа көптеген кітаптары әкелініп, оқырман үшін сөрелерден орнын тапқан.

Мұхтартану — Әуезовтің өмірі мен шығармашылығын зерттейтін қазақ әдебиеттану ғылымының бір саласы. М.Әуезовтің шығармашылығы жайлы тұңғыш пікір «Сарыарқада» (1917ж. №2) «Талап азаматының», «Еңлік-Кебек» пьесасын алғаш рет қойылуы жайлы жазылған «Игілікті іс» хабары. Жазушының шығармалары 1921 жылдан бастап жариялана бастады да, көркемдік кесек болмысы көзі қарақты әдебиетшілердің назарын бірден өзіне аударады. «Еңлік-Кебек» пьесасы туралы «Еңбекші қазақ» газетінің (5.01.1927ж.), С.Мұқановтың «Тілші» (2.10.1925ж.), Мұстафаның «Еңбекші қазақ» (18.03.1928ж.), «Бәйбіше-тоқал» хақында, Даниалдың «Ақжол» (23.12.1923ж.), Смағұлдың «Еңбекші қазақ» (31.10.1926ж.)газеттерінде мақала, рецензиялары жарияланды.