Түркістан облысы мен Шымкент қаласының тұрғындарына ескерту!
Аналогты хабар тарату жүйесі толығымен өшірілді. Оның орнына цифрлық телевизия келді. Цифрлық жүйенің ерекшелігі елді мекендерде бұған дейін 10 шақты телеарна көрсеткен болса, енді 30-ға жуық арналар ұсынылатын болады. Ең бастысы сапалы. 
Аналогты хабар таратуды тоқтату бұл Елбасының «Цифрлық Қазақстан» мемлекеттік бағдарламасын жүзеге асыру болатын. «Қазтелерадио» Акционерлік Қоғамы бүгін Түркістан облысы мен Шымкент қаласында көрсетілетін телеарналарды цифрлық жүйеге толығымен ауыстырды. Енді Шымкент қаласының тұрғындары үшін 30-ға жуық арналар қол жетімді болса, Түркістан облысы орталықтары мен елді мекендерінде бұған дейін көрсеткен 4 арнаның саны енді 15-ке жетіп отыр. Цифрлық жүйеге ауысу қарапайым халық үшін еш қиындық туғызбайды. Егер сіздің теледидарыңыз абоненттік телвизиялық жалғаманы қолдаса, әдеттегі үй антенасын қолданып қосуға болады. Ал, теледидарыңыз бұл DVB–Т2-ге сай келмесе, сандық сигнал ресиверін қолданып цифрлық эфирге ауыса аласыз. 
Белгіленген аймақтарға сандық хабар таратуға ауысу үшін 79 цифрлық таратқыштар қосу арқылы 79 радио және теледидар станциясы салынған және жаңартылған. Қазіргі таңда цифрлық жүйемен 857 елді мекеннің 2,4 млн. халқы қамтылып отыр, яғни Түркістан облысының 99 пайызы.
Ағымдағы жылдың соңына дейін сандық хабармен қамтылмаған 20 елді мекендер, яғни 1413 үй де жаңа өзгеріске қол жеткізетін болады. Сондай-ақ, «Қазтелерадио» АҚ Шымкент қалалық және Түркістан облысы аудандары әкімшілігімен бірігіп, әлеуметтік көмек алатын 27 509 отбасыға «Отау» теледидар қызметін орнатып бермек.
Аруна Пернебек.
