Елбасы әрбір Жолдауында жастар мәселесін назарында ұстап келеді. «Келер жылды «Жастар жылы» деп жариялауды ұсынамын» деген болатын. Сол бастамамен рухани астанада студенттер күні халықарлық деңгейде тойланды. Атаулы мерекеге орай «Түркі әлемін тоғыстырған – Түркістан» атты «Жайдарман» ойыны өтті. Түркістан облысы әкімінің жүлдесі үшін түркі тілдес мемлекеттерінің жастары алаңға жиналды. 
«Жайдарман» ойындары алғаш рет рухани астанада өтіп отыр. Бұл жолы тек отандастарымыз ғана емес, бауырлас елдердің жастары да келіп қатысты. Өзбекстан, Қырғызстан, Башқұртстан, Татарстан, Түркия елдерінен өздерінің астарлы әзілдерін арқалай келген меймандар көрермендерге күлкі сыйлады.
Түркістан облысының отбасы, балалар және жастар істері жөніндегі басқармасы мен «Жастар ресуртық орталығының» ұйымдастыруымен өтіп отырған сайыс жастардың бойындағы мәдениеттілік, рухани-адамгершілік, өнер мен білімге деген шығармашылық ізденістерін дамытып, түркі тілдес мемлекеттердің жастары арасында халықаралық ынтымақтастықты нығайтты.
«Түркістан – татулық тірегі», «Күлкі әлемінен- түркі әлеміне», «Түркі әлемін тоғыстырған – Жайдарман», «Бірлікпен Түркістанға» тақырыптарында астарлы ойлары мен көрерменнің көңіліне ой салып, әзіл әлемінің шыңын бағындырды. Сайыс талаптары бойынша қазылар алқасы қатысушылардың тіл тазалығына, ұшқыр ойы мен сахнада сөйлеу, өзін-өзі ұстауына, уақыт тиімділігі мен соңғы жаңалықтарды сапалы көрерменге ұсынуына қарай баға берді.
Түркістан облысы әкімінің тағайындаған кубогы өз иелерін тапты. Бірінші орын 500 мың теңге қаржылай сыйлықты Алматыдан келген «Юсуф Мироғұлының қарындастары» ұтып алса, екінші орын 300 мың теңге «Шымкент жастарына» бұйырды. Қонағын сыйлай білген жерлестер 200 мың теңге үшінші орынды Түркияның әзілкештеріне берді. Студенттерге толған зал күлкіге қарық болды, ал астарында шындық бар зілді әзілдер сала мамандары үшін құлағына алтын сырға.
Айтолқын Молдабекова.
