Жастар өз кәсібін неден бастайды? Өз ісін бастауға қандай мүмкіндік бар? Бұл сұрақтар бүгін «Нұр Отан» партиясы Шымкент қалалық филиалының ұйымдастыруымен «Бизнестің жол картасы-2020» бағдарламасы бойынша кәсіпкерлікті қолдау кеңесі мүшелерінің жас кәсіпкерлермен кездесуі барысында тақырып өзегіне айналды.
Жастарға «Атамекен» ұлттық кәсіпкерлер палатасы, мемлекеттік мекемелер және қаржы институттары өкілдері кеңес берді.
«Атамекен» ҰКП Шымкент қалалық филиалы бизнес-тренері Қанат Әбілдабеков Шымкент қаласында 2017-2021 жылдарға арналған жұмыспен қамтуды және бұқаралық кәсіпкерлікті дамыту бағдарламалары аясында «Бастау Бизнес» жобасы іске асырылғанын мәлімдеді.
-«Бастау Бизнес» жобасының аясында білімін жетілдіргендер негізінен жұмыссыздар, өз-өзін жұмыспен қамтығандар және кәсіпкерлікке ынтасы зор азаматтар болып табылады. Әрбір білім алушыға мемлекет тарапынан 16 759 теңге көлемінде стипендия төленді. Жоба аясында 1730 азамат толыққанды білім алды, оның 346-сы өз кәсібін ашты, — деді ол.
— Жаңа нәрсені үйрену ешқашан кеш емес. Менің ойымша, адам даму үшін білім алады, ал мамандығын дұрыс таңдау арқылы табысқа жетеді, — деген бизнес-тренер жастарды «Атамекен» ҰКП филиалына оқуға шақырды.
Шымкент қалалық кәсіпкерлік және индустриалды-инновациялық басқармасының бизнесті қолдау бөлімінің басшысы Үсен Исаев сөз алып, бизнес-жобаларды қаржыландыру барысымен таныстырды
— Бес бастаманың 4-ші бағытын орындау мақсатында шағын несиені ұлғайтуға республикалық бюджеттен Шымкент қаласына 475,4 млн.теңге, Нәтижелі жұмыспен қамтуды және жаппай кәсіпкерлікті дамытудың 2017–2021 жылдарға арналған бағдарламасының екінші бағыты «Жаппай кәсіпкерлікті дамыту» шеңберінде 345,7 млн. теңге қаржы бөлінген. Жалпы Шымкент қаласына шағын несиелендіруге 2018 жылға 821,1 млн. теңге қарастырылған. «Даму» кәсіпкерлікті дамыту қоры» АҚ-ның өңірлік филиалы тарапынан бағдарлама шеңберінде 382,1 млн. теңгеге 36 жобаға шағын несиелер берілген. Бүгінгі таңда 76 жобалар жиынтығы жинақталып, 21 жоба мақұлданған. Сондықтан, жылдың соңына дейін шағын кредит алуға әлі мүмкіндіктеріңіз бар, — деді басқарма өкілі.
Жастар бизнес-жоба қалай жасалынады, қандай кезеңге жоспарланады, шағын несие алуға кепілдеме мәселелері бойынша сұрақтар қойды. Кездесу барысында барлық сұрақтарға мамандар тарапынан толыққанды жауап берілді.
