Бүгінгі Тараздың мерейлі мерекесіне орай игі шара «Темір жол вокзалы аллеясы» мен «Көне Тараз» стелласының салтанатты ашылуымен жалғасты.
Ізгі шарадағы лентаны қию рәсімі Жамбыл облысының Құрметті азаматы, «100 жаңа есім» жобасының жеңімпазы Сембай Әбетайұлы мен темір жол саласының ардагері Сағымбек Ақшолақовқа бұйырды.
Күн сайын көркіне көрік қосып, ажарлана түскен шаһарда бүгінде кескін-келбетін заман талабына сай көркемдеп, сәулеті мен сымбатының артуында әрбір қала тұрғындарының және патриот азаматтардың еңбектері орасан.
Тараз қаласына кіретін бас қақпаның бірі — темір жол вокзалы. Осы аумақты ретке келтіру мақсатында, алдындағы скверді қайта жаңғырту жұмыстары жүргізілген. Бұрын соңды бұл аумақта қалаға келген қонақтарға ежелгі Тараз өңірінен сыр шертетін көрініс болмаған. Осыған байланысты, скверде «Көне Тараз» стелласы қойылған. Айналасы абаттандырылған стеллаға Тараз қаласының бұрынғы төрт атауы (Тараз, Әулие-ата, Талас Жамбыл) сондай-ақ, тарихи кезеңдерді бейнелейтін қобыз, домбыра, дәуіт, балбал тас сынды ұлттық құндылықтар орнатылған.
Скверде 940 шаршы метр жолаяқ төсеніші жасалып, 4000 шаршы метр жерге асфальт төсеніші салынған. 20 дана жарық шамдары, 8 дана орындық, 8 қоқыс жәшіктері қойылып, 2700 шаршы метр алаңға суару жүйесі орнатылған.
Эскиздік жоба жаңадан құрылған «Сәулеттік бюро» мекемесінің жас архитекторлары тарапынан әзірленген. Жоба бойынша, Сквердің абаттандырылған аумағы — 1 га. Аталған жоба «Айя сервис» ЖШС-нің тарапынан тараздықтарға «Туған жерге тағзым» жобасы аясында тарту етілді.
Бүгінде жаңа белестерге қадамдап келе жатқан көне Тараз тарихи оқиғаларға бай шаһарлардың бірі екені баршамызға мәлім.
«Айғақ-ақпарат».
