— 20 Қазанда Қазақстан, Ресей және Өзбекстан мемлекеттерінің басшылары Түркістан облысының Сарыағаш ауданында бейресми кездесу өткізді. Яғни, Елбасы Нұрсұлтан Назарбаев Ресей Федерациясының Президенті Владимир Путинмен және Өзбекстан Республикасының Президенті Шавкат Мирзиеевпен кездесті. Ал Мемлекет басшылары бейресми кездесу барысында елдер арасындағы, соның ішінде сауда-экономикалық және мәдени-гуманитарлық салалардағы ынтымақтастықтың өзекті мәселелерін талқылады. Сонымен қатар басқосуда Қазақстан Республикасының Ресей Федерациясының және Өзбекстан Республикасының ТМД және басқа да халықаралық ұйымдар аясындағы өзара іс-қимыл мәселелері қарастырылды. Сондай-ақ, тараптар өңірлік және халықаралық күн тәртібіндегі негізгі аспектілер жөнінде пікір алмасты. Осы орайда саялы Сарыағаш ауданының тұрғындары үш Президенттің нақ осы ауданда бас қосқандығын тарихи оқиға деп бағалап отыр.
— Үш мемлекет көшбасшылары кездескен орын Сарыағаш ауданына қарасты Құркелес ауылдық округі аумағында орналасқан. Яғни табиғаты ерекше бұл аумақтың айналасы аудан диқандарының еңбеккорлығын аңғартып тұрғандай. Себебі, мұндағы егістік телімдер тамшылатып суару технологиясы бойынша егілген жүзім алқаптарымен жайқалып тұр. Сондықтан осы бір еңбекқор өңірдің тұрғындары үш Мемлекет басшыларының Сарыағашта бас қосқандығын мақтан тұтады. Сондай-ақ, Елбасымыз Нұрсұлтан Назарбаевтың көршілес елдермен тату -тәтті қарым қатынас орнатуының нәтижесінде бірлігіміз бекем, ынтымағымыз берік болып отырғандығын айтқан аудан тұрғындары ел экономикасының қарышты алға жылжып әлеуметтік ахуалдың жақсара түскендігін Мемлекет басшысының қажырлы еңбегімен байланыстырады.
— Бүгін Үкімет отырысында инвестицияларды тарту мәселесін қарау қорытындысы бойынша Премьер-Министр Бақытжан Сағынтаев инвестициялық ахуалды одан әрі жақсарту және ел экономикасына тартылатын шетелдік инвестициялардың көлемін ұлғайту жөнінде бірқатар нақты тапсырмалар берді. Осы жылдың 9 айының қорытындысы бойынша инвестициялар тартудың барлық түйінді көрсеткіштері өсті. Жаңа кәсіпорындар мен жаңа жұмыс орындары құрылуда. Инвесторларға барлық деңгейлерде мемлекеттік қолдау шаралары көрсетілуде. Инвестициялар тартудың жаңа тәсілдері енгізіліп жатыр. Дегенмен, Премьер-Министр қосымша жұмыстардың орындалуын талап ететін бірқатар аспектіге назар аударды.
— Түркістан облысының әкімі Жансейіт Түймебаев Парламенті Мәжілісінің депутаты Әбдіманап Бектұрғановпен кездесті. Басқосуда өңірдегі білім саласының бүгінгі жай – күйі кеңінен сөз болды. Кездесу барысында аймақ басшысы Мемлекет басшысының «Қазақстандықтардың әл-ауқатының өсуі: табыс пен тұрмыс сапасын арттыру» атты халыққа арнаған Жолдауында атап көрсетілген міндеттерді негізге ала отырып, облыстағы білім сапасын арттыру бағытында атқарылып жатқан жүйелі жұмыстарға тоқталды. «Елбасымыз кезекті Жолдауында Үкіметтің алдағы уақытта атқаратын жұмыстарды нақтылап берді. Соның бірі білім беру жүйесінің сапасын арттыру. Қазіргі таңда өңірімізде осы бағытта бірқатар жобалар жүзеге асырылуда. Атап айтсақ, білім сапасын жақсартуды, одан бөлек аталған салада кездесетін кейбір кемшіліктермен күресуді заманауи технологиялардың көмегімен іске асыруды қолға алдық. Бүгінде мектептерге электронды күнделік жүйесін енгізіп жатырмыз. Мұның артықшылығы сонда, әрбір ата-ана өз баласын үнемі бақылауда ұстайтын болады. Қандай баға алғанын, сабаққа қаншалықты қатысып жүргені туралы ғаламтор арқылы біліп отыратын болады. Сондай-ақ, мектептерге ұстаздарды жұмысқа қабылдау шаралары да электронды жүйенің көмегімен атқарылуда. Бұл құжат рәсімдеу кезіндегі адами факторды азайтып, нәтижесінде жемқорлықтың алдын алуға сеп болады», – деді Жансейіт Қансейітұлы. Елбасының бастамасымен жүзеге асып отырған бағдарламалардың орындалуына қаныққан халық қалаулысы алдағы уақытта Түркістан өңірінің өсіп-өркендеуі жолындағы жобаларға барынша өз үлесін қосып, қолдау білдіретінін жеткізді. Сондай-ақ, ол бірқатар аудан, қалалардағы сайлаушыларымен кездесіп, жергілікті жердегі атқарылып жатқан оңды істермен кеңінен танысты.
— Мемлекет басшысының Жолдауына сәйкес 2019 жылдың 1 қаңтарынан бастап еліміздегі барлық емханалар мен ауруханалар медициналық құжаттарды қағазсыз, цифрлық нұсқада жүргізуге көшуі тиіс. Бұл 2020 жылға қарай бүкіл тұрғындардың электронды денсаулық паспорттарын жасауға, кезектерді жоюға, қызмет көрсету сапасын арттыруға мүмкіндік береді. Міне осы бағыт аясында Сарыағаш аудандық орталық ауруханасында да ауқымды жұмыстар атқарылып келеді. Яғни, 190 мыңнан астам тұрғынға қызмет көрсететін мекемеде медициналық қызмет түрлерін цифрлық жүйеге қосу бойынша кешенді жұмыстар атқарылып отыр.
— Отырар ауданында анестезиолог-реаниматолог дәрігерлердің кәсіби мерекесіне арналған жиын өтті. Еркін форматта өткен басқосуда аудан басшысы Ерлан Айтаханов дәрігерлерді мерекелерімен құттықтады. Ағынан жарылып ізгі тілегін жеткізген аудан әкімі мұнан соң медицина қызметкерлеріне Алғыс хат табыстады. Сонымен қатар, келелі жиын концерттік бағдарламаға ұласып, отырарлық өнерпаздар ән мен жырдан шашу шашты. Өлі мен тірінің арасында бір демі әрі, бір демі бері жатқан науқасты қайта өмірге әкелетін реаниматолог дәрігерлердің еңбегі ерен. Бұл жалғаннан күдер үзген миллиондарға үміт отын сыйлап, уақытпен санаспай, Гиппократтың антына әрдайым адал жандар. Адам жанының арашасысы болған ақ халатты абзал жандарға қандай құрмет көрсетсекте артық емес.
— Шымкент қалалық денсаулық сақтау басқармасы және Шымкент медицина колледжінің студенттері халықаралық стандартқа сай симуляциялық оқыту курсынан өтуде. Осы мақсатта аталмыш медицина колледжіне Якутия Республикасының жоғары білікті оқу ордасынан оқытушылар мен студенттер келіп, теориямен практиканы ұштастыруда.
— Үшінші мегаполисте жұмыссыз жастардың саны 2,4%-ды құрап отыр. Яғни, қазіргі нарықтық кезеңінде жастардың көбі сұраныс аз мамандық иесі атануына байланысты аталған статистикалық мәліметтің саны өсуде. Осының алдын алу мақсатында Шымкент қалалық жастар ресурстық орталығының және жұмыспен қамтту орталығының мамандары бірлесіп №24 Саттар Ерубаев атындағы мектеп лицейінің оқушыларымен кездесті.
— «Домалақ ана» кесенесінің шырақшысы Сәттігүл Молдабекқызының ұйымдастыруымен Бәйдібек ауданының қарттарына арналған ізгілікті іс-шара өтті. Оған ауыл қариялары,ақ жаулықты аналар мен батыр аналар шақырылған.
