Алматыда Шерхан Мұртазамен қоштасу рәсімі өтіп жатыр

Бүгін Алматыда Мұхтар Әуезов атындағы Қазақ мемлекеттік академиялық драма театрында қазақтың абызы, шындықтың шамшырағы атанған Шерхан Мұртазаны ақтық сапарға шығарып салу рәсімі өтіп жатыр.

Жазушының жақындарына көңіл айтуға мәдениет және спорт министрі Арыстанбек Мұхамедиұлы, Алматының әкімі Бауыржан Байбек, Жамбыл облысының әкімі Асқар Мырзахметов, энергетика министрі Қанат Бозымбаев, Халық Қаһарманы Бақытжан Ертаев, Мәжіліс депутататтары Серік Үмбетов, Сауытбек Әбдірахманов, Дархан Мыңбай, актер Асанәлі Әшімов, «Егемен Қазақстан» республикалық газеті» акционерлік қоғамының Басқарма төрағасы Дархан Қыдырәлі және тағы басқалар келді. Сондай-ақ, Түркістан, Жамбыл облыстарынан арнайы құрылған делегация қатары қоштасу рәсіміне қатысты. Түркістан облысының делегациясын облыстық мәслихат хатшысы Қайрат Балабиев, ал Шымкент қаласынан барған делегцияны «Нұр Отан» партиясының Шымкент қалалық филиалы Төрағасының орынбасары Бахадыр Нарымбетов бастап барды. Делегация құрамында Нұрмахан Жолдасов, Дулат Әбіш, белгілі дәрігер Жасан Зекейұлы, Мархабат Байғұт, Шойбек Орынбай, Түлкібас ауданының әкімі Нұрбол Тұрашбековтер бар
Сағат 10:00-де басталған қоштасу рәсімін Қазақстан Жазушылар одағының басшысы Ұлықбек Есдәулет  жүргізді. Ал Елбасының көңіл айту жеделхатын Қазақстан Республикасының Мәдениет және спорт министрі Арыстанбек Мұхамедиұлы оқып берді.

«Шерхан Мұртаза бүкіл ғұмырын төл әдебиетіміз бен мәдениетіміздің дамуына арнаған біртуар азамат, қазақтың мұңын мұңдап, жоғын жоқтаған нар тұлғалы қаламгер, қарымды қоғам қайраткері болды. Ұлт руханиятында өзіндік қолтаңбасы бар заңғар жазушы соңына мол мұра, өрісті өнеге қалдырды.

Шерхан Мұртаза қазақ журналистерінің бірнеше буынын тәрбиелеген ұлттық баспасөздің биік бәйтерегі еді. Қашанда әділдік пен ақиқаттың алдаспаны болғаны үшін қара сөздің зергері, шындықтың шырақшысы атанған Шерхан Мұртазаны халқы «Шерағаң» деп қадір тұтты. Сонау Теміртаудағы еңбек жолымның тікелей куәсі болған ол Тәуелсіз мемлекеттің іргесін қалаған жылдарда да жанымда жүріп, елді ілгерілету ісіне зор үлес қосты.

Шерхан Мұртазаның қазақ руханиятындағы орны мен жарқын бейнесі ешқашан ұмытылмайды деп сенемін», — деді Елбасы.

Мұнан соң Алматы қаласының әкімі Бауыржан Байбек сөйледі. Ол өз сөзінде «Шерхан Мұртаза елінің маңдай мен таңдайына, редакторлардың редакторына айналған еді» деді.

Бүкіл қазақ елінің қабырғасын қайыстырған қаза жайлы Жамбыл облысының әкімі Асқар Мырзахметов те тебірене сөйледі.

Сондай-ақ, еліміздің «Нұр Отан» партиясы Төрағасының Бірінші орынбасары Мәулен Әшімбаев, Қазақстанның Ресей Федерациясындағы Төтенше және Өкілетті елшісі Иманғали Тасмағамбетов, ҚР  Ақпарат және коммуникациялар министрі Дәурен Абаевтардан көңіл айту жеделхаттары келгендігін рәсім барысында хабарлады.

Ал ағайын-туыстары атынан Оразалы Сәбденов шежірелеп сөйледі. «Ұлы Абайдан кейін қазақтың мұңын, тілінің, жерінің, елінің тағдырына қатысты мәселелерін көтерген жазушы болатын», — деді ол өз сөзінде.

1932 жылы Жамбыл облысы, Жуалы ауданы, Талапты ауылында дүниеге келген жазушы, қоғам қайраткері, ҚР-ның еңбек сіңірген мәдениет қызметкері, Қазақстанның халық жазушысы Шерхан Мұртаза 87 жасына қараған шағында өмірден өтті.

Ол М.В. Ломоносов атындағы Мәскеу мемлекеттік университетін бітірген соң 1955 — 56 жылы Қазақ мемлекет көркем әдебиет баспасында, 1956 — 60 жылы “Лениншіл жас” (қазіргі “Жас алаш”), 1960 — 63 жылы “Социалистік Қазақстан” (қазіргі “Егемен Қазақстан”) газеттерінде тілші, әдеби қызметкер, редактор, 1970 — 72 жылы “Жазушы” баспасы жанындағы Балалар мен жастар әдебиеті бас редакциясының және “Жалын” альманахының бас редакторы, 1972 — 75 жылы “Жұлдыз” журналының бас редакторы, 1975 — 80 жылы Қазақстан Жазушылар одағы басқармасының 2-хатшысы, 1980 — 89 жылы “Қазақ әдебиеті” газетінің бас редакторы, 1989 — 92 жылы «Егемен Қазақстан» газетінің бас редакторы, 1989 жылдан-«Егемен Қазақстан» республикалық газетінің редакторы. «Қазақстан» мемлекеттік телерадиокомпаниясының төрағасы болып қызмет атқарды. 1990 жылдан — Ұлттық саясат, мәдениет және тілді дамыту жөніндегі комитет мүшесі. 1994 жылдан — Мәдениет, баспа, бұқаралық ақпарат құралдары, қоғамдық бірлестіктер жөніндегі комитет мүшесі, Мәдениет, баспа, бұқаралық ақпарат құралдары, қоғамдық бірлестіктер жөніндегі комитеттің мәдениет, әдебиет және өнер бөлімдік комитетінің төрағасы. ҚазКСР Халық депутаты (1990-1993). ҚР Жоғарғы Кеңесінің (1994-1995), ҚР Парламенті Мәжілісінің 2-ші шақырылым (1999-2004) депутаты.1992 — 94 жылы “Қазақстан” мемлекет телерадиокомпаниясының төрағасы қызметтерін атқарды. 12, 13-шақырылған ҚР Жоғ. Кеңесінің, 2-шақырылған ҚР Парламенті Мәжілісінің депутаты болды. Сондай-ақ ол ҚР Президенті жанындағы Ұлттық кеңестің мүшесі. 1995 жылдан — шығармашылық жұмыспен айналысуда. 1996 жылдан — «Егемен Қазақстан» газетінің қызметкері.

«Құрмет белгісі», «Отан» ордендерімен марапатталған (1999). «Қара алқа» романы үшін ҚазКСР Мемлекеттік сыйлығының (1978); Қазақстандық Лениндік Коммунистік Жастар Одағы, Жалпыодақтық Лениндік Коммунистік Жастар Одағы, «Тарлан» тәуелсіз сыйлықтарының лауреаты (2000). ҚазКСР мәдениетіне Еңбек сіңірген қызметкері. Қазақстанның Халық жазушысы (1992). Қырғыз Республикасының Халық ақыны.

Халық жазушысын Алматы қаласының шығыс бөлігіндегі беткейде орналасқан танымал тұлғалардың пантеонына айналған Кеңсей 1 зиратына жерледі. Мұнда Еркеғали Рахманбердиев, Қалтай Мұхаметжанов, өзінің шәкірті Оралхан Бөкей сынды қоғам қайраткерлері мен елге белгілі азаматтар жатыр.