Ауданда 650 гектар жүзім алқабы жайқалып тұр.
Түркістан облысы Жетісай ауданында қауын, қарбыз жинау науқаны аяқталуға жақын. Өңір диқандары жүзім теру жұмыстарына кірісіп кетті, деп хабарлайды облыс әкімінің баспасөз қызметіне сілтеме жасап.
Бүгінде Жетісай ауданында жалпы 650 гектар жүзімдік алқабы бар болса, оның 82,5 гектары ағымдағы жылы отырғызылған. Қазіргі таңда жетісайлық диқандар жүзім алқаптарынан 2832 тонна өнім жинап үлгерді. Мол өнім жинап жатқандардың қатарында «Арсенал-сад» ЖШС-де бар.
Аталмыш серіктестік иелегінде 75 гектар алма, 92 гектар жүзімдік алқабы бар. Алманың бір келісі 100-150 теңге, ал жүзімнің бір келісі 80-100 теңге аралығында сатылуда. Өндірілген өнімнің басым көпшілігі еліміздің солтүстік облыстары мен көршілес Ресей елінің шекаралас аймақтарына жөнелтілуде. Серіктестіктің жұмысына жаңа серпін тілеген аудан әкімі алдағы уақытта өңірде қарқынды бау көлемі мен жүзім плантацияларын ұлғайту көзделіп отырғандығын жеткізді.
Жетісай ауданындағы жүзім алқаптарының басым көпшілігі Кеңес заманында әлемге аты мәлім болған Абай ауыл округінде орналасқан. Аталған округте қазіргі таңда 293,5 гектар жүзім алқабы жайқалып тұр. Қазірдің өзінде абайлық диқандар 1362 тонна жүзім жинап, ауданда көш бастады.
