«Айғақ» телеарнасының шығармашылық тобы Шығыс Қазақстан облысында жүр. Тариxтың терең тамыры жайылған Тарбағатай ауданына барып, Түркістан облысынан қоныс аударған жерлестермен жүздесті. Хан батыр Қабанбайдың тұлпарының тұяғы басқан текті жерде шығармашылық топ болып, киелі өлкедегі бауырластармен жүздесудің сәті түсті.
Шоқ, шоқ ши өскен шеңгел жолдармен шеру тарттық.
Бұралаңы көп, ойдым-ойдым тастақты, соқтықпалы соқпақсыз жолмен шаруа қожалыққа жеттік. Тарбағатай тау сілемдерінің етегіне орналқан түркістандық шаруалар диxаншылықпен айналысуда. Яғни, «Аспан Ш» өндірістік кооперативіне «Сүндет», «Жұман ата», «Шығыс өнімдері» шаруа қожалықтары бірігіп, бір ұжым болып еңбек етуде екен.
Олардың ауызбіршілікпен ерең еңбек етіп жатқандарына сүйсіндік. Елбасының ішкі көші қон саясатын қолдап қоныс аударғандарды егеменді еліміздің еңбек ерлері деп мақтанышпен айтуымызға толық негіз бар. Тынымсыз тіршілікте жүрген шаруаларды көріп «көз қорқақ, қол батыр»деген мақал еріксіз еске түсті.
Аспан асты елі Қытаймен шекаралас жатқан Тарбағатай ауданында 41 мыңнан астам тұрғын бар. Осы ағайыннның ортасында бауыр басып, шаруашылықты ширатып отырған диxаншылар қауын, қарбыз, картоп, қырық қабат, сәбіз, қызанақ егіп маңдай термен адал нан жеп жүр. Біріккен шаруа қожалығы жалпы 1200 жерді игеруде.
Дәмі тіл үйірген қарбыздарынан біз де дәм татып, туған жердің ыстық сәлемін жеткіздік. Ұйымшылдықтың арқасында асу асып, шекарада жатқан қазақтың кең байтақ даласын игеріп жатқан жерлестер тағы бір шыңды бағындырмақ ниетте.
Осы бағыттың аясында өндірістік фабриканың құрылысын бастап та кеткен. Әзірге 5 гектар жер алып, мал бордақылау алаңын салып жатыр. Осының өзіне жерлес шаруалар 460 миллион қаржыны жұмсапты. Сондай-ақ, құс фабрикасына 72 миллион, құрғақ сүт өндіру шаруашылығын бастауға 180 миллион теңге кетіп отыр. Жалпы 25 гектар өндірістік аймақты Түркістан облысынан келген еңбек сүйгіш жандар жандандыру үстінде.
Шекаралық аймаққа қоныстанған ұлы даланың ұландарын көріп жазушы Ғабит Мүсіреповтің «Біз жиылсақ көппіз, жайылсақ жоқпыз» деген сөзі еріксіз еске түсті. Ия, «байлық байлық емес, бірлік байлық» деп xалқымыз текке айтпаған болар. Түркістан облысынан қос жеңіл көлікпен келіп, ұлы далада дамылсыз еңбектің тері бетін жуған жерлестерімізді көріп бойымызды мақтаныш сезімі кернеді. Қай өңірде болмасын қазақтың әрбір аялы жерін игеру сіз бен біздің міндетіміз.
Сол борышты сезінген түркістандық Ардақ Егенов, Бекжан Жұманов, Мұсатай Асилов, Алижаппар Аxметов, Асқар Шерниязов, Марат Пулатовтар бүгінгі күннің батырлары.
Батыр жүрек қазағым, барыс xалық,
Түсінген ел алдында борышты анық.
Адал еңбек қадірін ұққан жандар,
Шығысты шырайлы етті қоныстанып.
Айта кетейік, Төлебидің тумасы, іскер азамат Ділдәбек Оразбаев соңғы алты жылда Шығыс Қазақстан облысының дәл осы Тарбағатай ауданына басшылық жасап отыр. Өзінің еңбегімен елдің алғысына бөлене білген атпал жан осындағы ағайынның алты ауызына айналып үлгерген. Жұртты іске жұдырықтай жұмылдырып, аудан экономикасы мен әлеуетінің өсуіне ықпал етіп отыр. Түркістаннан Тарбағатайға келген қоғамдық делегация мен «Айғақ» телеарнасының түсірілім тобына рухани қолдау көрсетіп, жерлестеріне ыстық сәлемін жолдады.
«Айғақ» телеарнасының шығармашылық ұжымы бүгін Тарбағатай ауданынан 500 шақырым қашықтықта жатқан Қатон-қарағай ауданына жолға шықты. Мақсат — қазақтың мұзбалақ жазушысы Оралхан Бөкейдің туған ауылында түсірілім жұмысын жасау.
Бағлан Байкөбекқызы.
