Шаһарымыздағы ҚР ІІМ-не қарасты Б.Момышұлы атындағы оқу орталығында 242 түлек біліктілігін арттырды. Бүгін аталған оқу орталығын тәмамдаған бітірушілерге құқық қорғау органдарына қызметке тұру мақсатында арнайы бастапқы оқыту курсынан өткені үшін сертификат тапсырылды. Салтанатты түрде ұйымдастырылған шара барысында бірқатар ардагерлер марапат төрінен көрінді.
Қоғамдық тәртіпті нығайту, қылмысты ашу, яғни қауіпсіздікті сақтау полиция қызметкерлерінің басты міндеті. Ал, бұл міндетті асқан қырағылықпен жауапкершілікпен атқару оңайға соқпасы анық. Дегенмен, бұл саланың өзіндік қиындығымен қызығы да бар. Салтанатты шарада арман қуып келген бітіруші түлектер ҚР ІІМ-не қарасты Б.Момышұлы атындағы оқу орталығы бастығының міндетін атқарушы полиция полковнигі Сұңғат Тленшиннің алғысына бөленді.
Бүгінде ел ішіндегі келеңсіз оқиғалардың алдын алып тәртіпті күшейтуде бар қиындыққа төзіп талай жылын осы салаға арнаған ардагер қызметкерлері де баршылық. Өткен шарада өз қызметін абыроймен атқарған ардагер ағаларға жедел іздестіру саласына 100 жыл төсбелгісі табысталды. Мемлекет басшысы ұлт жоспарын жүзеге асыруда ІІО-на көптеген міндет жүктеп, осы саланың қызметкерлерінің жауапкершілігін күшейткен болатын. Мәселен, 30-шы нақты қадамын да жергілікті атқарушы органдарға және қоғам алдында есеп беретін жергілікті полиция қызметін құру туралы тапсырма берді. Ол өз кезегінде әрбір қоғам сақшысының алдында маңызды жауаптар жүктеген. Өткен шара барысында сертификатқа ие болған түлектер алдағы уақытта Елбасының тапсырмасын тианақтылықпен атқарып, халықтың қорғанына айналу міндеті тұрғанын тілге тиек етті.
