Грэпплингтен алғашқы Әлем кубогы Астанада өтеді

Грэпплингтен алғашқы Әлем кубогы Астанада өтеді. Сондай-ақ, әр түрлі елдерден келетін балуандар іріктеуден өтпей-ақ халықаралық Asia Open турниріне қатыса алады. Бұл туралы ҚазАқпарат елорда әкімдігінің ресми сайтына сілтеме жасап хабарлайды.

28-29 шілдеде Астанада кең ауқымды шара өтеді. Қазақстанның бас қаласында грэпплингтен алғашқы Әлем кубогы ұйымдастырылады. Іс-шараның бастамашысы — ҚР Грэпплинг ассоциацисы. Әлем кубогына Ресей, Америка Құрама Штаттары, Бразилия, Қазақстан сияқты елдердің командалары қатысады деп күтілуде. Кубок мачтық кездесу түрінде өтетін болады. Бір команда басқа бір командаға қарсы шығады.

«Бұған дейін грэпплингтен Әлем кубогын ешбір ел ұйымдастырмаған, сол себепті бұл шара біз үшін өте маңызды. Қазақстан — осындай форматтағы жарысты өткізуге шешім қабылдаған әлемдегі алғашқы ел», — деп атап өтті Қазақстан грэпплинг ассоциациясының президенті Қанат Алин.

Сонымен қатар, дәл осы күндері халықаралық Asia Open турнирі өтеді. Оның басты ерекшелігі күресуге ниет білдірген азаматтардың барлығына жарысқа қатысу мүмкіндігі беріледі. Бүгінге дейін спорттық бәсекеге қатысуға Ресей, Өзбекстан, Қырғыстан, Литва, Украина, АҚШ сияқты 500-ден астам спортшы өтініш білдіріпті. Бұдан бұрын Asia Open ұйымдастырылмаған еді. Азиядағы грэпплинг комитетінде бұл турнирдің грэпплингті Азия континентінде ғана емес, күллі әлемде дамытуға ықпал ететінін айтты.

Былтыр Қазақстан грэпплинг ассоциациясының ұйытқы болуымен елордада көптеген жарыстар өткен болатын. Олардың ішінде Астанада грэпплингтен өткен алғашқы Азия чемпионаты, жыл сайынғы Astana Open турнирі сияқты балалар мен ересектер арасында өткен халықаралық және республикалық жарыстар, грэпплингтен Қазақстан біріншілігі мен Кубогы бар. Осы ретте Батыс, Шығыс, Солтүстік, Оңтүстік және Орталық Қазақстанда өтетін 5 турнирден тұратын Qazaq Batyry Championship жарыстары да үлкен маңызға ие.

18-19 тамызда Qazaq Batyry Chаmpionship-тің негізгі кезеңі өтеді. Оның қорытындылары бойынша Астанада өтетін жылдың ең басты оқиғасы — 2018 жылғы Әлем чемпионаты додасында Қазақстанның намысын қорғайтын балуандар таңдалмақ.

Айта кетейік, грэпплинг — дзюдо, самбо, джиу-джитсу, еркін, грек-рим және басқа күрестің барлық стилін қамтитын жекпе-жектің түрі. Грэпплингтің артықшылығы — спортшылар екі секция бойынша күреседі.

Спортшылардың салмағын ресми өлшеу рәсімі 27 шілдеде сағат 18:00-де Тұран көшесі, 4/2 мекен-жайы бойынша орналасқан «Дәулет» спорт кешенінде өтеді.