Алдағы он жылда еліміз шет елдерден 1 млн бас асыл тұқымды ірі қара мал сатып алуды жоспарлап отыр. Бұл туралы ҚР Ауыл шаруашылығы министрлігі Мал шаруашылығы департаментінің директоры Еркебұлан Ахметов айтты.
«10 жылдың ішінде ірі қара мал басы санын екі есе арттыруды жоспарлап отырмыз. Бүгінгі таңда елімізде 7 млн ірі қара мал бар. Малдың санын 10 жылдан кейін екі есеге арттырсақ, оның саны 15 млн-ға жетеді. Осы орайда бағдарлама аясында 1 млн-ға жуық ірі қара мал басын шетелден әкеліп, оларды шаруаларға береміз. Осылайша, тиісті жұмыс жүргіземіз», — деді Еркебұлан Ахметов.
Айта кетейік, бүгін үкімет отырысында етті мал шаруашылығын дамыту стратегиясының жобасы мақұлданды. Бұл бағдарлама жүзеге асса, елімізде мал шаруашылығымен айналысатын 80 мың ферма құрылады.
Сондай-ақ аталған бағдарлама аясында он жыл бойы жылына шетелден 100 мың бас ірі қара мал импорттау көзделген. Шетелдік ірі қара малды елге осы салада тәжірибесі бар ірі бизнес өкілдері жеткізеді. Асыл тұқымды малды өз кезегінде фермерлер несиеге немесе ақшаға сатып ала алады.
Естеріңізге сала кетейік, асыл тұқымды ірі қараны сатып алу бағдарламасы бұған дейін де елімізде болған. Осыдан бес жыл бұрын АҚШ пен Еуропадан Қазақстанға 55 мың ірі қара мал импортталған.
Дереккөз: Baq.kz.
